Champion tum Cameroon-in Switzerland an ngam lo

Cameroonian Football Federation president Samuel Eto'o-a'n champion tura a beisei chu an ram Cameroon a ni a, beiseina sang tak nen Qatar a thlir.

Mahse, World Cup-a quarterfinal aia sang la thleng ngai lo ram hian an match hmasa berah European team vantlang Switzerland an ngam lo a, Al Janoub Stadium-ah 1-0 in an tlawm.

Indomitable Lions (Cameroon sawina) hian Eto'o hnuaiah dual nationality (ram pahniha khua leh tui nihna nei kawp) player an zawng nasa a, chumi hmang chuan team thar din an tum.

Qatar-a an match hmasa bera Cameroon veltu erawh Cameroon-a piang, Switzerland khua leh tui nihna neitu Breel Embolo a ni a, kum 25 mi striker hian a goal khung a lawm duh lo.

Bul ṭan ṭha
Cameroon-in bul an ṭan ṭha a, mahse, tun ṭum erawh, "Bul ṭan ṭhat chu a zahve zo ang a ni," tih chu Cameroon ta a ni lo - Switzerland lakah an tlawm a, a hmawr bawk theih loh rah an seng.

Switzerland hian 4-2-3-1 formation rawn hmangin, pangngai taka Cameroon nawr an harsat a, winger hna thawktu Xherdan Shaqiri leh Ruben Vargas ten tlarhnung venpui an ngaih pawimawh tel avangin an che hleithei lo.

Cameroon chu chak duh zawk niin an lang a, tlarhmaah Bayern Munich tana season duhawm tak hmangtu Eric Choupo-Moting a hmuhnawm a, midfield aṭangin Martin Hongla-a'n tlarhma a pui ṭha.

Full back aṭangin Nouhou Tolo a tlan chhuak tam a, Bryan Mbeumo leh Lyon forward Karl Toko Ekambi pawh an tha a za tih a lang a, mahse, a pawimawh ber goal an keng tel lo.

Barakhaih!
Second half-ah Switzerland an rawn danglam a, goal an rawn khung zawk tlat - second half ṭan aṭanga minute thumna lekah Embolo chuan goal a rawn khung a, Cameroon tlarhnung an mutthlu.

Switzerland tan Granit Xhaka leh Remo Freuler ten midfield-ah ṭha taka hna an thawh hnuin mual ding lam sirah Shaqiri an pe a, Liverpool midfielder hlui hian a ball petna tur a en zet hnuah Embolo tan a siamsak.

Monaco striker Embolo tan awlsam taka goal khung mai loh chu tih tur a awm lo - Cameroon tlarhnung lamin an tih tur an ti tawk lo a, Switzerland-in hma an hruai.

Switzerland player-te goal khung lawmin lam mah se Embolo erawh a ding tlat - Cameroon-a piang a ni a, a nu leh pa inṭhen hnuah France-ah an pem a, a nuin Swiss mi pasala a neih hnuah Switzerland-ah an pem leh a, December 2014 khan Embolo hi Swiss mi nihna pek a ni.

Vanneihna
Cameroon tan Eric Choupo-Moting, Bryan Mbeumo leh Martin Hongla ten goal khungna chance duhawm an nei vek a, mahse, an chhawr lo vek!

Indomitable Lions-in an hun ṭha chhawr loh rah sengin goal an chhuah a, Swiss team an phur sawt bawk - Cameroon keeper Andre Onana-a'n Ruben Vargas hun ṭha neih a dansakte chu an mualpho tur khuhtu a ni.

Switzerland tan Embolo leh bench aṭanga luhtir Haris Seferovic ten chance duhawm an nei bawk a, mahse, Cameroon tlarhnungten ṭha takin an dang thei hram.

Rossocrociati (Switzerland sawina) boss Murat Yakin chuan, "Switzerland team awm tawha ṭha ber," tiin inkhelh hmain a sawi a, a thusawi dikna Cameroon lakah an lantir phawt - Brazil leh Serbia an la hmabak tih erawh hriat a ṭha.