Senegal leh Qatar tan insiamṭhat hun

Zanin dar 6:30 hian point la hmu lo Qatar leh Senegal te Al Thumama Stadium-ah an inkhel dawn. Inelna thlengtu Qatar hian an match hmasa berah Ecuador an hneh lo a, Senegal-in Netherlands an hneh lo bawk - an chak lohna hi 2-0 ve ve a ni.

Chutihrualin chak lo ve veah Senegal hi team ṭha zawk an ni a, Netherlands lakah an vanduai tihin a sawi theih. Qatar erawh Ecuador lakah an khel chhe hrim hrim a, second half-ah phei chuan inkhel entu tam zawkin stadium an chhuahsan.

Zaninah erawh chak mamawh ve ve an nih avangin inkhel a hmuhnawm dawn a, Qatar tan pawh tlarhnung venhim ringawt theih a ni dawn tawh lo. Inelna thlengtu hian ram tana match 100 chuang khel thei player panga ngawt an kawl.

Captain Hassan Al-Haydos-a'n midfield a ho dawn a, match 171-na a khelhna tur a ni. Abdelkarim Hassan (131), Karim Boudiaf (116), Abdulaziz Hatem (108) leh Boualem Khoukhi (106) te ho nen Senegal lakah an tawnhriat hman ṭangkai ngei a ṭul tawh ang.

Senegal-in Sadio Mane nei lo mah se team ṭha tak an ni tih Netherlands lakah an pholang. Chutihrualin Senegal hian match hmasa berah goal khungtu an tla chham a, ram tana goal 10 khung tawh Ismaila Saar leh goal thum khung tawh Boulaye Dia te an che ṭhat a ṭul.

Tlarhnung lamah captain Kalidou Koulibaly-a'n hna ṭha zawka thawh a duh a, keeper Édouard Mendy tan tihsual a thiang tawh lo. Netherlands laka goal hnih an chhuah kha Mendy tihsualah a ngaih theih.