Netherlands khingpui tur Ecuador

Khalifa International Stadium-ah zanin dar 9:30 hian Netherlands leh Ecuador te a inkhel dawn a, team pahnih hian point thum ve ve an hmuh tawh avangin second round luh theihna remchang a ni.

Qatar an hmachhawn ṭumin Enner Valencia-a'n goal hnih a khung a, West Ham striker hlui hian a khupah hliam tenau a tuar. Ecuador coach Gustavo Alfaro chuan, "Enner Valencia hian Netherlands a hmachhawn dawn a, chu chu thil chiang a ni," tiin an chhawr ngei tur thu a sawi a, danglamna thlen thei player hi Virgil van Dijk leh a ṭhiante tan hnawksak a ni thei ang.

Netherlands-in an match hmasa berah Memphis Depay hi bench ṭaangin a lut a, coach tawnhriat nei ṭha Louis van Gaal-a'n bul a ṭantir ang em tih hi zawhna a ni. Dutch manager Van Gaal chuan, "Danglamna thlen thei player a ni a, khelh ngei a duh ang. Mahse a dinhmun ka thlir phawt ang," tiin bul a ṭan daw em tih a chiang lo.

Depay awm lo mah se Netherlands-in Cody Gakpo an nei. Senegal laka goal hmahruai khungtu Gakpo hian tun season-ah PSV Eindhoven tan match 24-ah goal 13 a khung a, Ecuador lakah pawh en bik a hlawh ang.