Ronaldo hoin Portugal an chak

Lionel Messi telna Argentina-in champion rin hlawh mah se an match hmasa berah team naran Saudi Arabia an ngam lo a, Cristiano Ronaldo telna Portugal erawhin Ghana chu 3-2 in an ngam thung.

Ronaldo hian Portugal goal hmahruai chu penalty aṭangin a chhuih lut a, World Cup vawi ngaa goal khung vek thei hmasa ber a ni - hmeichhe World Cup chhiar tel lohin!

Manchester United nena inṭhen hlim Ronaldo goal khung hi Ghana tan Andre Ayew chuan sut mah se, Portugal-in Joao Felix leh substitute Rafael Leao hmangin an khung leh a, Ghana tana Osman Bukhari khungin awmzia a nei phak tawh lo.

Group H inkhel dangah Uruguay leh South Korea ten goal an khung lo ve ve a, 0-0 in an ṭin - he group pawh hi a la ngaihnawm dawn chauh niin a lang.

Mittui nen Ronaldo
Portuguese hnam hla play a nih laiin mittui nen Ronaldo a ding a, tun hnaia a hun tawn nena ngaihruat chuan a awm lo hran lo - lungsi taka a kirna Manchester United nen an inhmu thiam lo a, interview-ah na takin a club hi a sawisel.

United an che ve vat a, Ronaldo nena an contract an titawp - club nei lo chungin Ronaldo-a'n World Cup a hmachhawn a, hnam hla sak laia a mittui a lo hnam hi a demawm hran lo.

Ronaldo hian a mittui chu lawmnaa chantir tumin goal khung a tum a, first half-ah chance nei nual mah se a chhawr lo a, a goal khung lah Alexander Djiku laka foul avangin pawmsak a ni lo - mittui a hul dawn lo em ni?

Mahse, minute 65-na a ni a, Ronaldo fan-ten an hmuh châk an hmu - Southampton defender Mohammed Salisu chuan Ronaldo a titlu a, penalty a chawi. Club nei lo Ronaldo-a'n harsatna nei loin goal-ah a chantir a, 1-0 a ni.

A hmuhnawm
Ronaldo-a'n goal a khung hnuah inkhel a hmuhnawm sawt a, tlawm tum bik lo Ghana-in Ayew hmangin an sut - Mohammed Kudus khung loh pawh a uiawm a, mahse, an insiamṭhat tak tak hmangin Portugal bawk an inlar.

Minute 78-naah Atletico Madrid forward Joao Felix chuan player class zia pholangin hmahruaina goal a khung nawn a, minute hnih hnuah bench aṭanga luhtir Rafael Leao chuan a khung ve leh bawk.

Mahse, Ghana an beidawng lo - minute 89-naah Bukari chuan si phurh a rawn sut ṭhen a, Red Star Belgrade winger hian Ronaldo tih dana 'siuuuu' chungin a goal khung a lawm zui.

Ghana an vannei teuh hle - Portugal keeper Diogo Costa chuan a hnungah Inaki Williams a awm tih hre loin ball a dah a, petchhuah a tum. Athletic Bilbao forward hi chak takin rawn tlan mah se a tawlh thlu a, a duh anga a pet hman loh avangin Portugal an him hram.