Lewandowski goal khung hun?

Robert Lewan-dowski-a goal khung theih zia inhrilh nawn a ngai lo, khawvel striker ropui an sawi apiangin a hming hi lamrik a ni ve tawh ang. Mahse, famkim lohna khawvelah hian Lewy pawhin famkim lohna a nei ve tho - World Cup bikah goal a la khung miah lo.

Barcelona striker Lewandowski awmna Poland hian zanin dar 6:30-ah Saudi Arabia an hmachhawn dawn, last 16 lut tur chuan chak ngei a pawimawh tawh a, chak turin Argentina hneh thei ram lakah goal khung a ngai dawn.

Mexico nen an inhnehtawk ṭumin Poland hian goal khung theihna remchang ṭha bik an nei, penalty an hmuh chu captain Lewandowski hian a hlah tlat, a hmaa ding goalkeeper Guillermo Ochoa chuan a lo dansak.

Kum 34 mi Lewandowski chuan, "Penalty ka hlah avang khan pawi ka ti a, pawm thiam pawh a harsa khawp mai. Hrehawm ti taka ka awm laia min thlawpna thu min thawn tute chungah ka thinlung takin ka lawm.

"World Cup a nih avangin eng emaw tak chu thleng thei reng a ni tih ka hria, tunah chuan chak zawh loh rilru hrehawm kha kan dah ṭha. Saudi Arabia lakah hian kan nihna dik tak kan lantir tur a ni ang, inkhel awlsam erawh a ni dawn lo," tiin a sawi.