Sanga ropuina dal theitu Chhinga Veng
Mizoram Premier League-a Mizo coach record nei ṭha ber Lalsangzuala Hmar-in Chawnpui FC hmangin a record neih ṭhat sa tih ṭhat belhna hun ṭha a nei a, zanin dar 7:00 hian Honda MPL9 semifinal second leg-ah Chhinga Veng FC an hmachhawn dawn.
First leg-ah Chawnpui hian 2-0 a hnehna an chan avangin final lut turin an dinhmun a ṭha a, mahse goal hnih khatin inkhel boruak a ti dang vek thei. Chhingcows-in beiseina sang tak an la nei a, RG Stadium-ah mipui an tam dawn. Chawnpui mipui nge tam dawn Chhinga Veng mipui tih chu zaninah a hriat ang.
Record ropui
MPL hi kum 2012 aṭanga ṭan kha a ni a, kum 10 liam ta khan Sanga hi Chanmari FC assistant coach niin Lalchhuanawma (L.Ch-a) hnuaiah coaching hna a thawk. Season chawhnu lama coach atana H. Vanlalthlanga an lak hnuah pawh Sanga hian assistant coach hna hi a chhunzawm zel.
Season khatnaah hian Chanmari hi pathumna an ni a, season hnihnaa Thlanga hoin an champion. Season thumnaah pawh Thlanga hnuaiah awm zelin final-ah Aizawl FC an hneh lo. MPL4-ah SYS lamin MPL-a Thlanga awm an remtih tak loh avangin Sanga hian Bethlehem Vengthlang FC a zawm a, semifinal a thlenpui.
MPL5-ah Sanga'n a inchher chhuahna Chanmari FC-ah a kir a, ama pualin MPL-ah a champion. MPL6-ah Chhinga Veng zawm lehin Sanga hian a champion pui leh a, MPL7-ah erawh final lutin Aizawl FC lakah an vanduai. MPL8-ah khan Sanga hian Electric Veng FC enkawl lehin final a thlenpui a, Aizawl FC bawk an hneh lo.
Sanga hian MPL-a knockout stage nawm hnuah knockout stage a la thleng vek a, MPL hnuhnung paliah final a lut - Chawnpui hi final a luhpui leh theih chuan a zawnin vawi nga final a luhpui leh dawn. MPL9-ah Sanga hian a record ropui tak hi belhchhah leh a tum ang.
A dang theitu Chhingcows
Chawnpui dal thei tur chu Chhinga Veng an ni a, Anand Gurung leh Lalremruata te inkawp hian Sanga kaihhruai team hi hneh an châk a, chumi theitu player pawh chu an kawl. Chhingcows hian semifinal first leg-ah Chawnpui hneh lo mah se league round-ah inkhel thunun chungin an hneh a, table-ah an san zawk bawk avangin inkhelh hmaa rinkai zawk an ni.
Tunah erawh Chawnpui dinhmun a ṭha ta zawk a, Chhinga Vengin inkhel ṭantir aṭangin an nawr a ṭul dawn. Chhingcows hian first leg-ah hrem vangin wing back Lalremruata an chhawr thei lo a, hei hian nghawng lian tak nei. Zaninah erawh Remruata a inlan thei dawn a, player dang an dam ṭha bawk.
Chhingcows coach Anand Gurung chuan, "Kan dinhmun kan hria a, chak ngei ngei kan mamawh. Kan naute pawh kan fuih ṭha a, ṭan phat aṭangin attacking football kan khel ang. First leg-a kan tihsual siam ṭhat nan minute 90 dang kan nei a, chumi kan tih theih chuan Chhinga Veng mipui thlawpna kan ngen a ni," tiin Vanglaini a hrilh.
Chawnpui par a vul zel?
Chenna ngai loh ramah Chawnpui FC an cheng mek a, tawp mai an tum lo - final thlen ngei an duh. Chawnpui club thuneitute an ṭang a, vengchhung mipui chawhphur nan 'banner lian' an tar a, coach Sanga hoin champion ngei an tum.
Chawnpui tan semifinal hi thil thar ni mah se coach Sanga bakah captain Lalrinchhana Tochhawng, David Lalrinmuana, Samuel Laltlanthanga, MC Malsawmzuala leh Lalliansanga te tan thil thar a ni tawh lo. Chutihrualin tun hnaia player chhuak thar ṭha ber zinga mi K. Vanlalhriatzuala leh Laltlanzova te an kawl a, an hun ṭha hi bawhpelh an tum lo ang.
Chawnpui coach Lalsangzuala Hmar chuan, "Tun season kan thlir chuan goal sarih te, goal ruk chhuah club-te an awm a, kan club ngei pawhin match khatah goal li kan chhuah tawh. Chumi awmzia chu first leg-a 2-0 kan chak hi la ṭha tawk lo a, chesual thei kan ni. Kan chetsual lohna turin plan A leh plan B chu kan nei e," tiin Vanglaini a hrilh.
MPL9 Thlirna Tawi
SECOND LEG
Zanin Inkhel Tur
Chawnpui FC 07:00 PM Chhinga Veng FC
FIRST LEG
November 23, Nilaini
Chhinga Veng 0 - 2 Chawnpui FC
CVFC : Laltlanzova 15'; MC Malsawmzuala 56'
MoM: Laltlanzova, Chawnpui FC
Player inlan
CVFC: RS Lallawmzuala; Rorelliana (Laltluangliana 46') , Abel Lalruatfela, Lalbiakhlua, Lalmuansanga (Varun Raj Tamang 46');
F. Lalrohlua (M. Lalpektluanga 88'), Johny Lalremruata, Lalengzama Vangchhia, Silvana R. Lalruatkima; Lalrokima (Lalrinzuala 64'), Vanlallawmtluanga (Jerry Lalchhanchhuaha 46')
CHFC: Moses Lalbiakngura (Lallawmzuala 46'); C. Lalhunruata, Lalrinchhana Tochhawng, Lalramdisanga, K. Lalruatdika (Teka); Lallawmsanga (Lalbuatsaiha 88'), Malsawmdawngkima, K. Vanlalhriatzuala, Laltlanzova; Samuel Laltlanthanga (Lalliansanga 67'), MC Malsawmzuala (Vanlalhriattluanga 90')
Note : Nizan khan Aizawl FC leh FC Venghnuai ten semifinal second leg an khel a, result kan hre hman lo.