Ducati-in min bia - Marquez

MotoGP champion lai Marc Marquez chuan Repsol Honda tana contract a ziah hma khan, an elpui team dang Ducati chuan a hma hun chungchang an zawh thu a sawi chhuak.

Spanish rider Marquez hi tun hnaiah chuan midang chunga leng a ni a, season hnuhnung pasarihah vawi ruk ngawt a champion - a record hi a ropui hle.

Honda tan hian kum li daih contract a ziak thar tawh a, contract a pawhsei hma khan Ducati lamin an lo ngaihven hman hle. A ṭha ber duha inel an nih avangin an lo be ve hi a mak hran lo.

Marquez chuan, "Kum 27 mi ka ni a, season li daih contract ka ziak thar - tunah chuan Honda bak ngaihtuah theih a ni rih lo. Mi ṭhenkhat chuan bike dang khalh chungin ka ṭha tawk em tih fiah turin min ti ṭhin.

"Honda hian ka duh leh a ṭha ber zel min pe a, team dang bike ka khalh a ngaihna ka hre rih lo. Ducati chuan thawm an nei ngei mai, mahse infiamna khawvel lam aṭanga ka thlir chuan ka tan Honda-a awm zel kha a ṭha zawk," tiin a sawi.

Ducati hian Yamaha bike khalh lai Maverick Vinales pawh an ngaihven nia sawi a ni. Amaherawhchu, Spanish tlangval Vinales nen pawh inremna an nei rih chuang lo.

MotoGP season hi coronavirus vangin tun thlengin an la ṭan thei lo, inelna buatsaihtu lam chuan July thla hian Jerez tlan kawngah kumina a hmasa ber ni turin Spanish Grand Prix tlan theih an inbeisei.