Saudi sorkarin United leh Liverpool lei an thlawp

Tun hnaiah Manchester United leh Liverpool neituten an club hralh an phal thu an puang a, sum tamna hmun Saudi Arabia sports minister Prince Abdulaziz bin Turki Al Faisal chuan an ram sumdawng hausa zingah Premier League club lei duh an awm chuan, an theihtawpa an thlawp tur thu a sawi.

Premier League club zingah Newcastle United chu Saudi Arabia nena inzawmna nei an ni a, anni hi Saudi Public Investment Fund chuan October 2021 khan 80% share nei turin an lei.

Prince Abdulaziz chuan, "Private sector ho aiawhin thil ka lo sawi ngawt thei lo. Mahse, Premier League lam an hawi nasa tih ka hria a, football hi kan ngaina em em bawk.

"Saudi-ah chuan Premier League hi en nasat ber a ni a, fans an tam hle. Saudi private sector zingah club pahnih hi lei duh an awm a nih chuan kan thlawp tlat ang - kan ram infiamnaah nghawng ṭha tak a nei thei dawn, tih kan hre tlat alawm," a ti.

United club lei duh zingah Apple, UK sumdawng hausa Sir Jim Ratcliffe leh Red Knights chu hming langsar an ni a, Liverpool hi khawvela hausa 10-na ni phak Steve Ballmer, Indian mi hausa tawntaw Mukesh Ambani leh Bain Capital neitu Stephen Pagliuca te nen sawi zawm an ni a, Saudi lam hming lam rik a awm ve ve bawk.