Zaninah Dinga a inhnek dawn

Mizo boxer ngaihven hlawh Laldingliana chuan zanin hian Japanese boxer Yuya Nakamura a hmachhawn dawn a, Colombo, Sri Lanka-ah round ruk an inhmachhawn ang - inhnek ṭan hun hi zan dar 8:00 a ni.

Nakamura hi WBC Asia bantamweight champion lai a ni a, vawi 13 professional fight hmachhawn tawh niin, vawi kua a chak a, vawi thum tlawmin, vawi khat chu draw a nei thung.

Tuipui boxer Dinga chuan, "Thla thum chhung ṭha takin training ka nei tawh a, huphurhna ka nei lo. Round ruk inhnek tur kan ni a, mahse, round nga bak kan mamawh lo ang," tiin Vanglaini a hrilh.

Dinga hian professional boxing a luhchilh hnuah vawi li inhnek hmachhawn tawhin, vawi thum a chak a, vawi khat chu no contest-ah puan a ni.

June, 2022 khan World Trade Centre, Dubai-ah Alimzhan Tursunov a hmachhawn a, mahse, Kazakhstan boxer hian glove hman phal loh a lo hman avangin inhnek hi a zawh hmain an titawp - zaninah Dinga a lo kir dawn e.