Hming langsar zinga langsar ber Richarlison

Brazil-in player langsar an kawl hnem avangin Serbia laka hnehna an chan chu mipui rin dan sa a ni a, kil tina star rual kawltu Brazil tan Richarlison a lansarh ber ringtu erawh an tam lo ang.

Mahse, hliamin a tlak buak chunga Tite-a'n a koh striker hian Serbia lakah goal hnih khungin a team chu 2-0 in hnehna a chanpui a, a goal hnihna phei chu World Cup goal mawi zingah chhiar tel a ni reng tawh ang.

Brazil thiampuipa Neymar chu hliam vanga lakchhuah a ni a, coach Tite-a'n a striker dinhmun a ngaihtuahawm loh thu sawi zui mah se, he thu buatsaih a nih lai hian a hliam dinhmun dik tak sawi chian a la awm lo.

Ningani tlai khan group G inkhel dangah Switzerland chuan 1-0 in Cameroon an lo hneh tawh bawk a, Thawhṭanniah group G team palite inlan lehin, Cameroon vs Serbia leh Brazil vs Switzerland en tur a awm leh ang.

Goal suh se!
Serbia squad an ṭha tawk a, Brazil kher hi bul ṭan nan hmang lo se point thum nena World Cup hawng thei tur khawp player an nei. Mahse, Brazil an tum miau a, kut ruakin match hmasa ber chu an thlah.

Eagles (Serbia sawina) coach Dragan Stojkovic-a'n an hmachhawn tur team a hrechiang a, 3-4-2-1 formation rawn hmangin, tlarhnung leh midfield a hnawh khat a, counter attack hmanga Brazil nawr let a tum.

Tlarhmaah Aleksandar Mitrovic a mal tlat a, a ṭul anga thlawp turin Dusan Tadic leh Lazio midfielder Sergej Milinkovic-Savic te an nei a, Serbia coach ruahmanna a fin thlak.

Serbia hian na taka Brazil nawr let nei lo mah se an tum ber pakhatah first half chhung an hlawhtling a, goal an chhuah lo - beiseina sang tak nen chawlhlawk an hmang.

A thlawn mai maw
Mahse, Serbia an ṭang reng thei bik lo - minute 62-naah player hnawksak Vinicius Junior-a shot chu Serbian keeper Vanja Milinkovic-Savic chuan a dansak a, a per lehlam chu Richarlison chuan goal-ah a chantir.

Tottenham Hotspur striker hian a la duhtawk mai lo - a goal khung hmasak hi vanneih goal tia sawisak an awm a nih pawhin, minute 73-naa a goal khung erawh thiam vanga pet goal a ni.

Vinicius-a siamsak chu Richarlison hian volley nuam tawk tur vela a pet kan hnuah, mawi zeta invawrh chungin goal-ah a chantir a, Serie A club Torino keeper Savic tan tih theih a awm lo.

Hun tawp thlengin goal dang a lut lo a, Serbia-in minute 90 chhunga target-a shot an neih ve loh avangin Brazil-in an phu ang ngeiin hnehna an chang.

Champion rim nam
Match khat chiah an la khel a, champion sawi nan a la hma. Mahse, Brazil khelh dan leh squad chhahzia enin, Selecao hi champion rim nam, tia sawi hi thil inthlahrunawm a ni lo.

Serbia lakah an vanneih zan ni se goal tam zawk khung thei an ni. Alex Sandro leh Casemiro ten woodwork an tih per a, Fred-a chance neih chu Milinkovic-Savic chuan ṭha zetin a dansak bawk.

Brazil-in Raphinha, Neymar, Vinicius, Richarlison leh Lucas Paqueta te la chhuak mah se Gabriel Jesus, Antony, Gabriel Martinelli, Rodrygo leh Fred te an la luhtir thei a, an squad a la chhah ṭha hle.

Bench lama hun hmang tluan zingah Ederson, Eder Militão leh Fabinho te an ho an la awm a, Brazil hmachhawn hi eng team mahin an châk lo ang, tih a chiang.