Croatia kan sawisak ngei a ngai - Canada coach

Belgium lakah hun ṭha nei tam zawk mah se Canada an chak lo a, coach John Herdman chuan an match khelh lehpekah an chak ngei ngei a ngai tih a sawi. Canada hian Pathianni zan dar 9:30 hian Croatia an tum dawn, manager thusawi hian sawi zui a hlawh hle.

Group F aṭangin tlang tur hriatthiam a la harsa. Pathianni zan dar 6:30-ah Belgium leh Morocco te an inkhel hmasa dawn, rinkai ber Red Devils hi an chak a nih chuan, midang result ngaihchan vak ngai loin an awm hahdam thei tawh ang.

Insawifiahna
Canada hian Belgium lakah khan penalty an hlah a, vawi 20 chuang goal khung tuma an pet chu a hlawh chham vek. Inkhelh banah coach Herdman chuan, "Hetiang anga khelh chhunzawm chi a ni lo. Croatia chu kan nghaisa tur a ni," tiin ṭawngkam a chhak chhuak.

Croatian media lamin Herdman thusawi hi an la vawng viau a, a ṭawngkam a mawi loh avangin sawi zui pawh a hlawh. Herdman chuan sawifiahin, "Chak loh thinrim laia thusawi a ni a, a boruak kha a danglam.

"Chutihrualin Croatia ngaihnepna leh tih elna lam a ni lo, ka naute ka fuih phur nan leh theihtawp chhuah tura ka hrilhna ṭawngkam zawk a ni," tiin a sawi, insawifiah mah se a thusawi hian inkhelh hma aṭangin boruak a siam tawh tho a ni.

Croatia an inpeih
Canada lam boruak kan hria, inkhelh chakin an tuihal. Croatia hian player senior an kawl nual a, kum 37 mi Luka Modric hoa khel an nih avangin an 'cool' angreng viau, thawm an neih nat loh avangin zuam ngawt chi chu an ni lo ang.

Real Madrid midfielder Modric chuan, "Morocco lakah khan goal khung lo mah ila kan khel chhe lo. A hmawr kan bawk theih chuan kawng a inhawng mai ang," tiin a sawi a, last 16 luh an duh a nih chuan Canada hneh theih hi a pawimawh dawn hle.

Modric bakah Ivan Perisic an nei a, tawnhriat nei tam Andrej Kramaric leh Nikola Vlasic an neih bakah, anni chawm tur hian Chelsea midfielder Mateo Kovacic an la nei bawk - Canada hneh thei turin an squad hi a chhah tawk ve bawk.

Lukaku a chiang lo
Inter Milan lama a kir leh hnuah Romelu Lukaku hi hliamin a tibuai deuh reng a, dam chiang lo chungin Belgium squad-ah koh a ni. Manager Roberto Martinez-a'n a sawi lawk ang ngeiin Canada lakah a striker ṭha hi a chhawr lo.

Pathianni zan atan pawh Lukaku dinhmun hi a la chiang thei rih lo, a inlan a nih pawhin minute 90 chu a khelh a rinawm loh. Canada laka goal awmchhun khungtu Michy Batshuayi an neih tho avangin Red Devils tan buaina a awm lo tura ngaih a ni.

Belgium hian an match khatnaah duhthusam lo mah se an chak tho a, player ṭha bik Kevin de Bruyne awmna an nih avangin dah hniam ngawt theih an ni lo, ani hi man of the match lawmman dawngtu kha niin, tun ṭumah pawh en hlawh bik a ni leh ang.