France leh Denmark a hmuhnawm dawn

Zanin dar 9:30 hian France chuan Denmark an hmachhawn dawn. Les Bleus hi an chak a nih chuan World Cup last 16 an lut fel der dawn, knockout stage luh nghal hi thil awlsam tak erawh a ni dawn lo - an khingpui tur hi an ṭha ve tlat.

Didier Deschamps-a naute hian an match hmasa berah Australia 4-1 in an sawp. Striker ṭha Karim Benzema awm lo mah se goal khung an harsat lo. Kasper Hjulmand-a hote erawhin Tunisia lakah goal an khung lo thung.

En bik tur Giroud
World Cup qualifying khelh laiin a hliam a, ram tan an ko tam tawk lo - Real Madrid striker Benzema a awm bawk avangin Olivier Giroud hi Qatar ramah a zin ve ang em, tih chu zawhna a ni hman, tunah erawh France-in an thlamuanpui a ni leh der tawh.

Arsenal striker hlui hian Australia lakah goal hnih a khung, awmna tur hmun a thlan thiam vanga a khung ve ve a ni. Ram tana goal khung hnem lamah Thierry Henry (51 goals) a nih rual der tawh a, zaninah a khung belh chuan record thar a siam dawn.

Paul Pogba leh N'Golo Kante te awm loh laiin Adrien Rabiot a langsar a, Juventus midfielder hi Denmark tana ven ngun ngai bik tur pawh a ni. Rabiot hi coach Deschamps nena buaina nei tawh, an koh leh hnuhnawh a ni a, an beisei ang ngeia khelh chhuah zel a tum ang.

Theihnghilh a thiang lo - France hian Kylian Mbappe an nei. Paris Saint Germain hi an champion hmasak ṭum pawh khan a langsar tawh, tun ṭumah pawh hian goal leh assist vawi khat ve ve a nei tawh, zaninah a neih belh a nih pawhin a mak dawn lo.

France hi an chak a nih chuan an tlang dawn chiang, inkhel dangah Australia leh Tunisia te an inhnehtawk bawk a nih chuan, match hnih lek aṭangin Les Bleus hi group D hmahruaitu an ni tlang daih thei dawn, an chak loh erawh chuan a la danglam vek thei thung.

Eriksen awmna
Thi hnu dam leh ang deuhthawa sawi theih Christian Eriksen awmna Denmark hi team hmuhnawm an ni. Euro 2020 laia lungphuchawl vanga tlu tawh hi Manchester United rinrawl a ni leh tawh a, zaninah pawh France player a chhaih buai viau tura ngaih a ni.

A hmasa berah chuan Denmark hian goal an venhim hmasak a ngai dawn. Barcelona defender Andreas Christensen leh AC Milan captain Simon Kjaer te an nei a, si ban nghaktu pawh Kasper Schmeichel a nih avangin an thlaphang lutuk bik lo ang.

Denmark coach Kasper Hjulmand chuan, "Kan dinhmun hi hriatthiam a harsa," tiin a sawi a, team ṭha tak ni chung sia tla thei an nihna a hmu thiam, zaninah a player neih ṭhat zawng zawng nen an beih tur thu a sawi bawk.

Team nem zawk tura ngaih ni mahse Denmark hian France lamah record an nei ṭha angreng. Nations League-ah 2-0 in an hneh a, kumin June thla khan 2-1 a an hneh bakah 2002 World Cup group stage-ah khan 2-0 bawkin an lo hneh tawh - zaninah chak an tum ngam ang.

France lamin hliam vangin Lucas Hernandez an chhawr thei dawn tawh lo a, tlarhnung an inrem thar a ngai dawn. Denmark hian an nawr ngam a nih chuan goal an khung mai a rinawm, point hmu tur erawh chuan anmahni goal venhim tel a ngai dawn.