Pathianni zanah Spain Vs Germany

FIFA World Cup-a final thleng ngun ber leh Brazil dawta champion ngun ber Germany chu match hmasa bera Japan an hneh loh avangin tla thei dinhmunah an ding. November 27, Pathianni zan dar 12:30 hian Al Bayt Stadium-ah Die Mannschaft-in Spain an hmachhawn dawn a, Hansi Flick-a hote hi puan thuah tel hmasa thei zinga mi an ni.

Pathianni tlai dar 3:30-ah Japan leh Costa Rica te Ahmed bin Ali Stadium-ah an inkhel dawn a, inkhel pawimawh a ni. Zan laia inkhel tur Germany leh anmahni ṭantuten Blue Samurai leh Costa Rica inkhel an ngaihven ang.

Japan an phur

Qatar 2022-ah Japan hming a langsar hle. Inkhelh ṭan hma hauhin Japan ṭantuten stadium hnuhma bal an tihfai avangin fak an hlawh a, match hmasa berah Germany an hneh leh bawk avangin an boruak a ṭha hle.

Blue Samurai khingpui tur Costa Rica erawhin Spain lakah goal sarih ngawt an chhuah a, hmabak a thim. Japan hian Costa Rica hi friendly match-ah ṭum hnih an hmachhawn a, 3-0 (2018) leh 3-1 (2014) in an hneh a, tun ṭumah pawh Hajime Moriyasu hote hi chak tur zawka rin an ni.

Germany lakah Japan hi second half-ah an khel ṭha a, bench aṭanga rawn lut player-te an che ṭha. Hemi a nih avang hian Moriyasu pawhin thutlukna harsa siam tur a nei dawn a, starting eleven a siksawi a ṭul ang. First match-a goal khungtu Ritsu Doan leh Takuma Asano te kha bench aṭanga lut ve ve an ni.

Chutihrualin Costa Rica hi first match aṭanga teh ringawt a rem bik lo a, Spain an chet ṭhat em avangin an theihna angin an khel thei lo. Real Madrid keeper hlui Keylor Navas pawhin a theihna angin a khel lo a, Japan laka point an hmu dawn a nih chuan Navas hi a chet ṭhat a ṭul dawn a ni.

Thih leh dam

Germany-in Japan an hneh loh bakah Spain-in an khingpui chiang taka an hneh avangin Hansi Flick-a hote hi thih dam karah an awm. Team pahnih inkhelh tawhna thlir kirin Die Mannschaft dinhmun hi a chhe lehzual. Kum 2020 khan Nations League-ah Spain hian 6-0 ngawtin Germany an sawp.

Inelna lian thamah pawh team pahnih hi an intum fo tawh. Euro 2008 final-ah Spain hian Germany an hneh a, World Cup 2010 semifinal-ah pawh La Roja thoin hnehna an chak a, inelna pahnihah hian Spain hi an champion ve ve bawk.

Qatar-a inelna neih mekah Luis Enrique hote bul an ṭan ṭha a, tlarhnungah Rodri pawt letin Manchester City tana khelh tum Aymeric Laporte nen inkawp mah se Costa Rica lakah chuan a fuh hle. Spain keeper Unai Simon-a'n hna a la nei lo a; captain Sergio Busquets leh player naupang zawk Pedri leh Gavi ten midfield an thunun hneh a, tlarhma lama awm Ferran Torres, Marco Asensio leh Dani Olmo ten an hna an tlin viau bawk.

Match hmasa ber aṭanga a lan dan chuan Spain hian Germany lakah pawh inkhel an thunun a rinawm. Mahse, uluk lehzuala bih chuan Hansi Flick-a hote hi che chhe hul hual an ni lo - an vanduai ve bawk.

Japan lakah goal chance an insiam hnem a, an goal khung thei lo. Ball possession pawh 74% an nei a, goal shot pawh vawi 26 an nei pha hial a, statistics thlirin an vanduai tih lang. Chutihrualin Flick-a'n tlarhnung a rem fuh tawk lo a, Spain lakah a siamṭhat ran a ṭul dawn.

Match hmasa berah defence laia awm Nico Schlotterbeck leh dinglama dah Niklas Sule te an che ṭha lo a, Flick-a'n pakhat zawk hi chu a thlak mai a rinawm. Chutihrualin tlarhmaah Kai Havertz a awm a, a hriam tawk lo. Germany hian tlarhnung tih phui an mamawh ang thoin goal khungtu an mamawh a, Spain lakah chhandamtu an mamawh.

Japan laka inlan lo Leroy Sane chu chhandamtu a ni thei a; Bayern Munich tana khelhpui dang Thomas Muller, Jamal Musiala, Serge Gnabry leh Joshua Kimmich te chu chhandamtu an ni thei bawk. A chhan chu tun hnaiah Bayern-in Barcelona an ngam a, zanin inkhel tur hi Germany leh Spain ni bawk mah se Bayern leh Barca inkhel tur tihin a sawi theih.

Thil thlen theih dan
Spain
2nd round: Germany an hneh hneh a, Japan-in Costa Rica laka point an hmuh bawk chuan chhiarkawp dan thlapin second round an lut ang. FIFA World Cup-ah hian head to head aiin goal difference a pawimawh zawk a, goal sarih khung tawhtu Luis Enrique hote hi an dinhmun a ṭha hle.
Tlak theih dan: Germany-in Spain an hneh a, Japan-in Costa Rica an hneh chuan Luis Enrique hote tan second round lut turin match hnuhnung berah Japan hneh ngei a ngai dawn. Enrique hote hi goal sarih ngawt an khung avangin dinhmun ṭha takah ding mah se Germany an hneh loh chuan dinhmun chhe ve duai thei an ni.

Japan
2nd round: Costa Rica an hneh a, Spain-in Germany laka point an hmuh bawk chuan second round an lut ang. Chutihrualin Germany zawk hi chak thei an ni a, Hansi Flick-a hote leh Spain nen hian point ruk vek hmuin group stage an khar thei. Hemi a nih avang hian second round lut turin Costa Rica hi sawp a ṭul.
Tlak theih dan: Japan hian Costa Rica laka point thum an hmu thei lo a nih chuan second round kawng a bumboh dawn. Chutihrualin an dinhmun hi Spain leh Germany inkhel result-in thui tak a nghawng a, tunah hian chak pawh ni se match tawp bera Spain an hneh loh chuan la tla thei reng an ni.

Germany
Japan leh Costa Rica inkhel result hre sain Spain an hmachhawn dawn. Japan hi an chak a nih chuan Hansi Flick-a hoten midang result innghat loa second round luh an duh a nih chuan Spain an hneh ngei a ṭul. Chutihrualin Costa Rica-in Japan an chelh thei a nih chuan Spain laka point khat hlawhchhuah hrim hrim pawh a ṭha thei ang. Mahse, Germany hian Spain an hneh lo a nih thung chuan 2018 World Cup ang thoin second round an thlen a rinawm loh.

Costa Rica
Costa Rica-in Spain lakah 7-0 ngawtin an tlawm. Luis Fernando Suarez hote hian World Cup khelh zel an duh a nih chuan Japan an hneh a ṭul a, chutihrualin goal difference aia point a pawimawh daih avangin tla chiang chu an la ni bik lo.