Messi leh Argentina tan fiahna

World Cup champion nih tumin an feh chhuak a, match hmasa berah Saudi Arabia an hneh loh nghal avangin Argentina lakah beisei neih san ngam a harsa. Lionel Messi awmna hian zanin dar 12:30 hian Mexico an hmachhawn dawn - chak loh nawn a thiang tawh lo.

Mexico hi last 16 luh tum ngam zinga mi an ni a, an match hmasaah Poland nen goal awm loin an inhnehtawk. Goal keeper ropui Guillermo Ochoa hoin Messi leh a ṭhiante dan an tum leh dawn, inkhel a hmuhnawm ngei ngei dawn tih a sawi ngam.

Group C aṭang hian pakhatna ni chunga tlang theih a pawimawh, pahnihna nih chuan last 16-ah Group D hmahruaitu an tum dawn, tuna a lan dan chuan France hmachhawn a ngai dawn tihna a ni a, duhthlan theih ni se Les Bleus pumpelh an duh ang.

Argentina coach Lionel Scaloni-a'n match fitness nei lo Cristian Romero a ring kha a tisual a, zaninah chuan Manchester United defender Lisandro Martinez zawkin bul a ṭan a rinawm, tawnhriat nei ṭha Nicolas Otamendi nen an dingkawp a nih chuan an nghet deuhin a rinawm.

Tlarhma lamah chuan Messi thlawp turin Angel di Maria leh Lautaro Martínez te an awm leh ang. Inter Milan striker hian Saudi Arabia lakah goal hnih khung mah se offside vanga hnawl a ni, thluak a hman lehzual a ngai tihna a ni.

An sulhnu en chuan zaninah chuan Argentina hi buk rit zawk an ni dawn. World Cup hmasa ber khan Le Albiceleste hian Mexico hi an hneh, a hnuah knock out stage aṭangin vawi hnih an pettla tawh a, tun hnai an intawn vawi 10 bikah an tlawm miah lo - an huphurh lo ang tih a rin ngam.

Match hmasa bera chak loh leh Argentina
Argentina tan World Cup match hmasa bera chak loh hi thil thar a ni lo, tun hmain vawi nga an lo tawng tawh.

1990 World Cup: Champion lai ni chungin an inlan a, mahse an match hmasa berah Cameroon 1-0 in an hneh lo, goal awmchhun hi Francois Omam-Biyik khung a ni. Diego Maradona awmna Argentina hian knock out stage an thleng a, final hial an lut. Mahse, nomawi inchuhna inkhelah West Germany 1-0 in an ngam lo.

1982 World Cup: Champion lai ni chungin Argentina an inlan, match match hmasa berah Belgium 1-0 in an hneh lo; European ram tan Erwin Vandenbergh chuan goal awmchhun a khung. Argentina hian group stage an paltlang a, mahse second round-ah Italy leh Brazil hneh loin an zinkawng a tawp.
1974 World Cup: World Cup 1970 atan an tling lo a, kum 1974-ah pawh tling mah se match hmasa berah Poland lakah 3-2 in an chak lo. Group stage chu paltlang tho mah se, second round-ah Netherlands leh Brazil an ngam lo.

1958 World Cup: Kum 24 hnua a vawi khat nan World Cup an khelh leh a, amaherawhchu an beisei ang a ni lo. An match khatnaah West Germany chu 3-1 in an hneh lo, hemi ṭum hian group stage an paltlang lo. Czechoslovakia lakah phei chuan 6-1 in an mualpho.

1934 World Cup: World Cup hmasa berah Argentina hian final an lut, inrintawkna sang tak nen 1934 World Cup khel turin Italy an pan. Inelna hi knockout hmanga neih a ni a, an khingpui Sweden lakah 3-2 in an chak lo.