Premier League Club Bihchianna Ringlotute karah Leicester City an champion

Leicester City-in kum 2016 khan khawvelin a ring lo chungin Premier League-ah an champion a, an sulhnu ropui tak hian club chanchin chauh ni loin infiamna khawvelah a lai lum luah pha zingah a tel ve ngei ang. 

Kum 1884 khan Leicester khawpui behchhanin football club din a ni a, a hming atan Leicester Fosse FC tih a ni a. Club din aṭanga kum 10 hnuah Second Division an khel ṭan a, stadium pawh an thlak ngun. Kum sarih chhung lekin stadium vawi thum an thlak - Victoria Park, Belgrave Road leh Victoria Park te an hmang hman a, kum 1971-ah Filbert Street-ah insawnin hei hi kum 111 tehmeuh an hmang.

Kum 2002 khan Walkers Stadium-ah an insawn a, kum 2010 aṭangin tuna an stadium hman lai King Power Stadium hi an hmang ṭan. Leicester Fosse hian 1894 khan Football League hnuaiah an inziaklut a, Second Division Club aṭangin an ṭan a, 1908-ah First Division khel turin an tling.

Amaherawhchu English football inelna sang berah an chefuh tawk lo a, an relegate lehnghal bakah hemi season hian Nottingham Forest-in 12-0 in an sawp a, club history-a an chak loh chian ber ṭum a ni.

Kum 1915 aṭanga 1919 chu Indopui Pakhatna avangin inkhelh theih a ni lo a, Leicester Fosse pawh sum avangin an buai. Kum 1919 hian din ṭhat leh a ni a, club history-a goal khung tam ber Arthur Chandler (273 goals, 393 appearances) hoin kum 1925 khan First Divison khel turin an inpet tling. 

Kum 1929 khan First Division-ah pahnihna an ni a, pakhatna Sheffield Wednesday chu point khat chiahin an pha lo. Foxes hian result ṭha bik nei loin hun rei tak an hmang chho a, kum 1958 khan coach atan Matt Gillies an lalut a, rah ṭha a thlen.

Giles hnuaiah Leicester hian 1961 leh 1963 khan FA Cup finals an thleng a, kum 1963 khan League-ah palina an ni pha. Kum 1964 khan League Cup-ah an champion a, an club history-a nomawi lian tham an chawi hmasak ber a ni. Kum 1968-ah Giles a bang a, kum 1969-ah Second Divison-ah an relegate nghal.

Leicester hi Second Division leh First Division-ah an inawm chhawk a, Premier League awm hnuah pawh Championship-ah hun rei tak an awm a, League One khelh lai te an nei bawk. Kum 2013-14 khan Championship-ah an champion a, Premier League-ah inpetkaiin hemi hnuah an relegate leh tawh lo. 

English Football history-a keeper ṭha pahnih Gordon Banks leh Peter Shilton ten Leicester City kawr hi an ha tawh a, chutihrualin club history-ah chuan kum 2016-a an champion ṭum kha theihngilh theih a ni tawh lo ang.

Leicester City hian Nigel Pearson hoin 2013-14 season khan Championship-ah an champion a, Premier League khel turin an tling. Foxes hi season khatnaah an relegate ṭep a, English manager Pearson-a'n a chhanhim hram.

An champion ṭum hian season ṭan hmaa inpuahchahna a fuh lo. Thailand-a an tour-naah manager fapa James Pearson leh rawlthar dang pahnih chu hotel-ah an chet mawi loh vangin an ban. Hemi hnu hian club neitu Thai pachal Vichai Srivaddhanaprabha (King Power chairman) nena intih thiam loh vangin manager Nigel Pearson-a'n hna a chan bawk.

Pearson thlak turin Foxes-in Italian manager Claudio Ranieri an la lut a, English manager hian club tana hna a thawh ṭhat avangin Italian manager thar hian pressure a ngah nghal hle. 

Leicester legend Gary Lineker phei chuan, "Ranieri hi coach tawnhriat nei ngah tak chu a ni ngei a, mahse Leicester thutlukna hian beisei a ti chau hle. Hming langsar coach-ten club hrang hrang an enkawl kual reng hi a mak a ni," tiin a sawi.

England striker thlirna hi a hunlai chuan a mak lo a, football chanchin zir uluk ber zinga ngaih pawisa thapna lam pawhin Leicester hi an champion an ring lo.

Season ṭantirh khan Leicester champion odds chu 5000/1 a ni a, chumi awmzia chu Foxes champion tura Re 1 dah chuan season tawpa nomawi an chawi chuan Rs 5000 an dawng dawh tihna a ni. Pawisa thapna buatsaihtute hian Foxes hi champion turin an ring lo bur tihna a ni a, club 20 zinga a ṭha ber an nih theih dan chu .0002 percent chauh a ni.

Ultimate Fighting Championship-a Holly Holm-i'n title kawltu Ronda Rousey a hneh khan khawvel barakhaih mah se Rousey chak tura an dah dan chu 8/1 chauh a ni. Kum 1990-a Buster Douglas-a'n boxer zinga ropui ber zinga ngaih Mike Tyson a hneh kha mak viau mah se betting odd lamah chuan 42/1 a ni pha chauh.

Leicester an ring lo tak tak tichiangtu erawh reality tv judge lar leh tv producer lar Simon Cowell-a British prime minister a nih theih dan odds chu 500/1 a ni pha chauh a, actress lar Kim Kardashian-i US president nih theih dan odds pawh 2000/1 a ni. Italian manager Claudio Ranieri hote hi season tir lam khan champion an rin loh dan lutuk hi awihawm lo zawk a, chutihrualin an squad thlirin a mak si lo.

Ringlotute karah Ranieri hoten rinna an nei a; season tawpah Chelsea, Manchester City, Arsenal, Manchester United, Arsenal, Tottenham leh Liverpool te chungah an awm a, an club history-a vawi khat nan Premier League-ah an champion.