Goal khung lo Uruguay & South Korea

Uruguay leh South Korea ten tlarhmaah player nei ṭha mah se, Ningani zana team pahnih intawn ṭumin goal hmuh tur a awm lo a, 0-0 in an ṭin - Portugal leh Ghana te nen an awm ho avangin, vawi khat draw hi a pawi thei.

Education City Stadium-a inkhelah South Korea-in Uruguay an chelh tluan thei a, mahse, Son Heung-min neitu team hi goal hmaah an hriam tawk lo a, goal an khung thei bik lo.

South Korea tana chance ṭha bera sawi ngam chu Hwang Ui-jo koah a tla a, mahse, Olympiakos forward hian uiawm takin bar chung lamah a thawn - uiawm tak a ni.

Taegeuk Warriors (South Korea sawina) hian first half inkhel thunun deuh mah se a pawimawh ber goal an khung thei bik lo a, Uruguay an khel ṭha tual tual.

Real Madrid midfielder Federico Valverde-a post perte chu Uruguay tan uiawm a tling a, Liverpool forward Darwin Nunez-a'n inkhelh chhung zawng South Korea tlarhnung chhaih mangang mah se goal a khung thei bik lo.

Uruguay tan Luis Suarez lansarh zan a ni lo a, bench aṭanga luhtir Edinson Cavani-a'n a luh hnuah Uruguay beiseina siam mah se a pawimawh ber goal a keng tel bik lo a, point khata lungawi an zir a ṭul.

Hun tawp hnaih lamah Tottenham striker Son Heung-min-a'n chance duhawm nei mah se a chhawr thei bik lo a, Uruguay fans lawmah a tla.