Newcastle lei tumna a fel thei lo

Saudi Arabia Public Investment Fund-in Premier League club Newcastle United-a share nei ngah ber nih an tumna chuan dodal a hlawh chhunzawm zel a, a dodal nasa ber pawl Hatice Cengiz chuan Premier League chu sum aia mihring zahawmna ngai pawimawh zawk turin a hrilh. 

Magpies hi PCP Capital Partners, Saudi Public Investment Fund (PIF) leh Reuben Brothers-te ṭangrual chuan pound maktaduai 300-a lei an tum a, an hlawhtling thei a nih chuan Saudi PIF hian 80% share an nei thei ang. 

Hatice Cengiz hi Saudi journalist lar Jamal Khashoggi-a kawppui a ni a, The Washington Post-a columnist leh Al-Arab News Channel-a editor-in-chief Khashoggi hi kum 2018 khan thah a ni. 

Western intelligence agency-te chuan Khashoggi hi Prince Mohammed bin Salman-a'n a thah tir niah an ngai a, mahse Saudi PIF Chairman hian puh a nihna erawh a pha thung - a kawppui thatu inhnamhnawihna hnuaia Magpies hralh a nih chu Hatice Cengiz chuan a duh lo a ni. 

Cengiz chuan, "Mihring hlutna leh zahawmna hi dah hmasak ber ni turah kei chuan ka ngai a, he thu hi Newcastle United lama management team leh thutlukna siamtu turte ka hrilh duh a ni. 

"Politics leh sum ringawt ngaihtuah a rem lo a, thil tih awm a nih leh nih loh pawh kan ngaihtuah tel a ṭul. Saudi Prince hnenah hian sumin engkim a lei thei lo tih hi kan lantir a pawimawh a, English football-ah hian tual thattu leh mi nunrawngten hmun an chang tur a ni lo," a ti - Premier League chuan Cengiz-i thusawi chungchangah hian engmah thuchhuah an la siam lo. 

Saudi sorkar rorelna na taka dodal ṭhintu Khashoggi hi a him zawk nan US-ah a awm ṭhin a, October 2, 2018 khan Cengiz-i nen inneih an tumnaa lehkha tihfel ngaite tifel turin Istanbul-a Saudi consulate chu a pan - hetihlai hian Cengiz chuan pawn lamah a lo nghak. 

Chhuitute chuan Khashoggi hi inchhungah hian an lo that zui niin an sawi a, tun thlengin a ruang hlawm tur a awm lo - UN special rapporteur Agnes Callamard chuan Khashoggi hi Prince Mohammed bin Salman chuan a thah tir ngei niin a sawi a, Saudi official dang pawh an inrawlh thu a sawi. 

Prince Mohammed bin Salman hian puh a nihna hi a pha a, Saudi court chuan nikum khan Khashoggi thahna thubuaiah mi panga chu thi turin an chung thu a rel a, a bak pathum chu lung in tang turin a ti bawk. Hetihlai hian Turkey chuan mi 20 ngawt thubuai a siamsak ve bawk. 

Cengiz chuan, "Magpies hi an lei loh hram kan duh. Mi pakhat rawng taka thah a nihna chungchang ringawt kan sawi lo a, middle east-in mihring dikna chanvoa khaw eng a hmuh ve mek humhim kan duh vang a ni tel a ni," a ti.

Magpies neitu Mike Ashley hian kum 2007 aṭang khan St. James' Park-ah neitu nihna a nei ṭan a, fan-te nen an inhmuhthiam loh fo avangin kum 2017 aṭang khan a club hi a zuar ṭan. 

Saudi sorkar hi an rama Premier League a ruka broadcast chu dodal duh loah puh a ni a, middle east lama PL official broadcaster beIN Sport chief executive Yousef al-Obaidly chuan hemi chungchang hi Premier League hnenah lehkha thawnin a lo sawi tawh bawk. 

Saudi Arabia hi mihring dikna chanvo rah beh chungchangah a mualpho hle a, infiamna khawvel hi an hmai bal phih fai nana hman tum anga sawi thawm a ri ring hle - Saudi PIF hian General Sports Authority nena ṭangkawpin Anthony Joshua vs Andy Ruiz Jr, golf, tennis, wrestling leh Spanish Super Cup thlengin a lo thleng tawh a, kum 2023-a Formula One Grand Prix thlen tumin hma a la mek bawk.

Cengiz chuan Premier League hnenah lehkha thawnin Magpies lei tumna chu dang turin a ngen a, chief executive Richard Masters chuan Cengiz lehkha hi chhangin engkim chu UK dan hnuai leh Premier League-in dan an neihsa anga kalpui vek a nih thu a sawi.