Czech Republic-ah tennis inelna a hnai

Czech Tennis Association (CTS) chuan May 26-28 chhung hian Prague-ah tennis tournament an buatsaih dawn a, an rama player langsar Petra Kvitova leh Karolina Pliskova te an inlan ang.

Tournament thupuangtu Karel Tejkal chuan, "Coronavirus vangin ram dangah zin theih a ni rih lo, ram chhunga tennis player-te tan Czech Tennis Association (CTS) chuan inelna a buatsaih dawn," tiin a sawi.

Wimbledon vawi hnih champion tawh Kvitova chuan a phur thu sawiin, "Hun rei tak chhung inkhel loin kan awm tawh, kan ram chhungah inkhelh theihna hun ṭha a awm tur hi kan vannei a, a lawmawm takzet," tiin a sawi ve bawk.

Tournament-ah hian hmeichhe player an langsar dawn, world number 12 Kvitova bakah hian world number 3 Karolina Pliskova, number 26 Karolina Muchova leh number 31 Barbora Strycova te an inlan ang.

Mipa inelna lamah pawh world number 65 Jiri Vesely a tel dawn. Czech tlangval hi Pune, India-a ATP tournament neih hnuhnung bera champion kha a ni.