Harsatna karah British GP an la beisei

Pathianni khan British prime minister Boris Johnson chuan an rama dan leh hrai hman tur a sawi a, tu pawh thlawhtheihna hmanga zin lut emaw Britain rama haw chu ni 14 chhung khung hran tur a ni.

Ni 14 chhung inkhung hran zel a ngaih chuan July thlaa neih an tum Formula 1 chu a nghawng buai ngei dawn, tun season hian Silverstone tlan kawngah inelna pakhat aia tam neih an beisei hial.

Covid-19 vangin tun season F1 intlansiak neih hmasak tur 10 zet chu a hun pangngaiah neih theih a ni lo, ṭhenkhat phei chu ṭhulh a ngai hial - inelna dang pawh la nghawng buai zel thei bawk.

British GP pawh hi entu awm loin kaltlang pui tum a ni. Mahse PM Johnson thusawi hnuah erawh an kaltlang pui thei dawn em tih a chiang ta lo - inelna dangte ang bawkin a hun sawn emaw, tun season atana ṭhulh pawh a ni thei.

Amaherawhchu, khaw-thlang media chuan sorkar inkaihhruaina hian infiamna lam chu an ngaihhnathiam dawn niin an sawi ve thung a, thu chiang erawh a la awm chuang lo.