Ram pawn player tan hmun a tlem dawn

All India Football Federation hnuaia AIFF Technical Committee chuan Indian Super League leh I League-a ram pawn player khel thei zat chu tih tlem an rawt a, 3+1 hman turin AIFF hnenah an thlen. 

Indian Super League-ah hian club pakhatin ram pawn player pasarih thlengin an hmang thei a, I League lam hian foreign player paruk thlengin an kawl thei thung. 

Mahse, AIFF technical committee lam chuan hei hi thlak danglam an duh a, ram pawn player pali awmin, an zinga pakhat chu Asian mi ngei ni turin AIFF executive committee lamah an thlen. 

Season thar atan ISL leh I League club-ten ram pawn player engemawzat contract an ziahpui tawh a, hei vang hian technical committee rawtna hi season lo awm tur aṭanga hman nghal theih tur erawh a ni rih dawn lo a, 2021-22 season aṭanga hman tur a ni ang. 

AIFF executive committe chu tun kar hian inrawn khawm hman tura beisei an ni a, AIFF president Praful Patel chuan technical committee aṭanga rawtna awm hi ṭha a ti niin phai lam media-te chuan an tarlang.