German football thil tum a la pangngai

May 16 aṭangin German football khelh chhunzawm tum a ni a, tun hnaiah Bundesliga 2 club Dynamo Dresden player pahnih-in Covid-19 kai thar mah se German Football League (DFL) an ruahman dan pangngaia kaltlangpui an la tum.

Dynamo player-ten hri an kai avang hian an team pumpui chu ni 14 chhung inkhung hrang tura tih an ni a, training an neih theih dawn loh avangin fixture an siam danglam a nih ngawt loh chuan an tan chuan league khelh chhunzawm hi a harsa hle ang tih a chiang.

Mahse, DFL thil tum a danglam phah rih lo. German Football League CEO Christian Seifert chuan, "Season pumpui dinhmun ti derthawng tur chu a ni lo. Hetiang harsatna hi chu kan tawk chho zel dawn, tun hi a bul ṭanna chauh a la ni.

"Player tam tak contract chu June thla tawp rualin a zo ve dawn, chumi hma chuan match a tam thei ang ber khelh kan duh a ni," tiin a sawi. June thlaah an zo lo a nih chuan player contract bakah hian TV lama pek chhuahna leh sumdawnna thlengin a nghawng buai dawn.