Ighalo-a'n United-ah cham zel a duh

Manchester United-a loan-a hun hmang mek Odion Ighalo chuan Old Trafford-ah hun rei zawk cham a beisei thu a sawi a, Premier League season hman zawh ngei a duh. 

Kum 30 mi striker hian January thla khan Chinese club Shanghai Shenhua aṭangin Manchester United hi loan hmangin a zawm a, a contract ang chuan May 31 thleng Red Devils tana khel tura tih a ni. 

Covid-19 vanga Premier League chawlh lailawk a nih avangin Ighalo hian a contract ang chuan English top flight league hi a khel zo thei dawn lo tih a chiang a, Chinese Super League chuan league khelh chhunzawm lam an lo sawi ve mek bawk. 

Ighalo chuan, "Tun hnaiah ka khel ṭhain nuam ka ti em em a, goal ka khung reng bawk. Thla khat dawn kan chawl ta reng mai a, ka theihna zawng zawng pe chungin ka inkhel a ni," a ti.

Nigerian striker hian United tan inelna hrang hrangah match riat khelin goal li a khung a, Premier League club hian an striker 'hawh' mek contract hi pawhsei an duh niin khawthlang media te chuan an tarlang.