Kum ruk atan Afghan wicketkeeper hrem

Afghanistan wicket-keeper-batsman Shafiqullah Shafaq chu thamna sum lak chungchanga a inrawlh avangin kum ruk chhung atan hrem a ni a, thubuai pali siamsak a nih chu kum 30 mi cricketer hian a pawm a ni.

Shafaq hian kum 2018 khan Afghan club Nangarhar Leopards tan khelin nikum khan Bangladesh Premier League club Sylhet Thunder tan a khel bawk a, a club khelhna pahnihah hian corruption-a inhnamhnawihah an puh.  

Afghanistan tana ODI match 24 khela Tenty20 match 46 khel tawh cricketer hian puh a nihna leh thubuai pali siamsak a nihte chu a pawm a, Afghanistan Cricket Board chuan kum ruk chhung atan an hrem ta a ni. 

Afghanistan Cricket Board senior anti-corruption manager Sayed Anwar Shah Quraishi chuan Shafaq chuan amahin thamna sum a la a ni mai lo a, a khelhpui a ṭhiante pawh hmin a tum thu a sawi. 

Sayed Anwar chuan, "Player dang zawng zawng tan hei hi kan vaukhanna ni nghal se, thamna suma inhnamhnawihte chu ACB hian a hre zel dawn," a ti a, player-te rin aia thil an hriat thu a sawi tel.