Chenna ngai loh ramah FC Venghnuai leh Chawnpui FC

Mizoram Premier League-ah champion thar an awm dawn. FC Venghnuai chuan champion lai Aizawl FC barakhaihin final an lut a, Chawnpui FC pawhin league round-a an tluk loh Chhinga Veng FC hnehin final an lut ve bawk. Venghnuai leh Chawnpui ten an club history-a a vawi khat nan MPL final an lut a, tualchhung football-ah 'lal thar' a piang dawn.

RG Stadium-ah Zirtawpni zan khan FC Venghnuaiin Aizawl FC 'kim' an hmachhawn a, 1-0 in an hneh. First leg-ah team pahnih hi 3-3 in an inhnehtawk a, Venghnuai final thlen nan H. Lalrempuia goal hi a tawk. Inrinni zanah Chhinga Vengin Chawnpui lehthal ngei tumin ṭum hnih ngawt hma hruai mah se 2-2 in an inhnehtawk. First leg-a che ṭha zawk Lalsangzuala Hmar hoten aggregate-ah 4-2 in hnehna an chang.

Hmabak harsa
FC Venghnuaiin semifinal first leg-ah Aizawl FC lakah 3-1 a an hnufual hnuin 3-3 in an nihrualpui a, final luh beiseina sang tak an nei. Amaherawhchu, Lalrindika Hmar hote hmabak hi a la harsa hle, first leg-a an hmachhawn hi Aizawl FC kim lo a ni.

Second leg-ah Aizawl FC-in rinlawk ang ngeiin I League vanga first leg-a an chhawr loh player-te an rawn hmang a, bul ṭantu zingah captain Lalchhawnkima, K. Lalmalsawma, K. Lalrinfela, R. Lalthanmawia leh Lalramsanga te an rawn awm. Foreigner erawh season ṭan hmaa club thuneitute inremna avangin an tel thei lo thung.

Venghnuai an pui
Khelmual chhungah Aizawl FC kim mah se technical area lamah erawh an kim lo. Coach Standly Rosario chu damlohna avangin a haw a, I Day Football final thlenpuitu Lalrozama Fanai leh FC Bethlehem aṭanga an lakluh coach Victor Lalbiakmawia ten team an ho.

Aizawl FC-in team ṭha zawk an ni tih an inhria a, ṭan phat aṭangin an nawr na hle. I League ang thoin MPL-ah pawh Amawia a hmuhnawm. Amaherawhchu Venghnuaiin an hun ṭha neih an hmang ṭangkai zawk.

Venghnuai defender H. Lalrempuia chuan corner aṭanga ball kal chu six yard box aṭangin a kein a khung a, Aizawl FC tlarhnung an mutthlu. Halftime hma hretin Mafela'n keeper Joel B. Lalramchhana tauh khum mah se goalline aṭangin tawnhriat nei ṭha C. Ramdinmawia'n a pet chhuak.

Second half-ah Aizawl FC goal bawh a na lehzual a, bench aṭanga lut R. Ramdinthara'n ṭha zetin goal-ah pet mah se goalline aṭangin Lalruatfela'n a tauh chhuak. I League club-in Venghnuai tlarhnung an su hawng thei lo a, Rindika Hmar hote second leg-ah 1-0 in an chak.

FCV-in ṭantu an nei ṭha a, player leh coaching staff ang thoin fak an phu. Venghnuai mipui ṭhahnem tak RG Stadium-ah an pung khawm a, final thlen theihna hun ṭha bawhpelh an tum lo a, a tawpah an inpekna rah an seng. Final-ah Venghnuai mipui ṭhahnem zawkin RG Stadium an mawi ang.

Chawnpui an par vul
Chawnpui FC-in I Day Football-ah semifinal an thleng zo lo a, an group-ah a tawpna berah an awm. MPL9-ah Lalsangzuala Hmar enkawl team hi relegation battle-a tel tura ngaih theih an ni hial.

Amaherawhchu MPL-a record nei ṭha coach Sanga'n a theihna a pholang a, team narana ngaih Chawnpui chu semifinal a hruai thleng. Final khel tur zawnnaah Chawnpuiin Chhinga Veng an hmachhawn a, first leg-ah 2-0 in an chak.

Second leg-ah Chawnpui hna awlsamin lang mah se goal khatin engkim a tidanglam vek thei a, awm nuama awm thei an ni lo. Chhinga Vengin chak ngei an tum a, left back Lalremruata'n hremna a hman zawh tawh avangin an ṭha sawt.

Inkhel hmuhnawm tak an pho chhuak a, Chawnpui captain Rinchhana Tochhawng tihsual hmang ṭangkaiin Chhinga Veng forward Vanlallawmtluanga'n goal-ah a pet a, crossbar per mah se hemi per hian Chawnpui keeper Lallawmzuala perin goal-ah a lut.

Chhinga Vengin beiseina thar an nei a, amaherawhchu first half tawp hmain Chawnpui player Laltlanzova'n player danglam bik a nihzia pholangin box chhungah rawn dawk zawkin a tauh goal.

Second half-ah Chawnpui an insiamrem a, Chhinga Vengin nawr ngaihna vak an hre lo. Sanga hote an dinhmun ṭha tawha ngaih hnuah Chhingcows substitute Lalengzama Vangchhia ball vawrhluh chu Lalrinzuala'n minute 80-naah cool zetin a pet goal.

Inkhel a nung thar a, boruak a nung hle. Chawnpui an hlauthawng a, chak zawk tur a chiang lo. Mahse, counter attack-ah K. Vanlalhriatzuala'n ṭha zetin a khalh lut a, a ball pek ṭha chu midfield laia player pawimawh Malsawmdawngkima'n goal-ah a chantir a, 2-2 in inkhel a tawp.

Chawnpui coach Lalsangzuala Hmar chuan, "Second 20 chauh rilru nuam takin kan awm. MS-a'n goal a khung hma zawng kha chuan hlauthawng reng rengin kan awm a ni. First leg-a kan chak kha kan vanneihpui a ni. Chhinga Veng hi team ṭha an ni a, khelmual chhung leh pawna an chevel pawh a mawi. Hetiang team kan hneh thei hi ka lawm hle a ni," tiin Vanglaini a hrilh.