Lewandowski-a'n GOAL a khung ta

Robert Lewandowski chuan World Cup-ah goal a khung ve ta. Barcelona striker hian goal a khung bakah Piotr Zielinski tan a siamsak a, inkhel hmuhnawm takah Poland chuan Saudi Arabia 2-0 in an hneh.

Mexico lakah Lewy-a'n penalty a hlah a, keeper danglam Guillermo Ochoa a paltlang thei lo. Saudi Arabia lakah pawh assist nei nghal mah se goal hmaah a vannei tawk lo, a khung tur hmasa pahnih chu ṭha takin an lo dansak.

Barcelona striker vanneih hun a inher chhuak, hun tawp hma minute 10 pawh awm tling tawh loah Saudi Arabia defender ball hloh a chang fuh a, goalkeeper Mohammed Al Owais tan dan theih a ni tawh lo.

Saudi Arabia an vannei tawk lo, hlauh nei loin an khel a, goal pawh an nawr na hle. Penalty an hmu a, mahse Saud Abdulhamid-a pet chu Wojciech Szczesny-a'n a lo dansak, khung ni se inkhel boruak a danglam mai thei.

Kum 34 mi Lewandowski chuan, "Ka tan World Cup hnuhnung ber a ni thei tih kan hria. A nihna takah chuan World Cup hi chu a boruak a danglam, hnam hla kan sak lai aṭangin rilru a kal thui tawh hle.

"World Cup a khel ve tawh, tia hriat nih ka duh lo. Goal a khung ve tawh, tia hriat ka duh, tunah chuan ka thil duh pakhat chu a hlawhtling ta," tiin Saudi Arabia laka a goal khung chu a ngaihhlut thu a sawi.