Mbappe hoin France an tlang

Kylian Mbappe-a goal hnih hmangin France chuan Denmark 2-1 in an hneh. Qatar World Cup khelh laiah Les Bleus hi last 16 lut hmasa ber an ni. France hi group hmahruaitu ni tur pawhin an dinhmun a ṭha a, mahse chhiarkawp dan hmangin pahnihna an la ni thei thung.

Goal khung harsat laiin Mbappe a inlar, ani hi chu danglam tura duan a ni. Angle zim tak aṭanga goal hmahruai a khung bakah, harsa angreng takin Antoine Griezmann-a cross a su lut bawk a, an ram a chakpui.

Inkhel hmuhnawm
Denmark hi Nations League lama France hneh theitu an ni a, kumin June thlaa an intawnah pawh a chak zawk an ni. Kasper Hjulmand-a naute hian Les Bleus hmachhawn dan an thiam a, hun rei tak chhung pawh an inveng thei.

Paris St-Germain star Mbappe a hmuhnawm, mual laia ball a virpui hnuah thui tak a tlanpui a, mahse keeper ṭha Kasper Schmeichel a paltlang thei mai bik lo, goal lut loin chawlhlawk an hmang, second half tir lamah pawh a lut mai lo.

Minute 61-na a ni, mual sirah Lucas Hernandez hliam vanga lut Theo Hernandez leh Mbappe ten mawi takin ball an in pe tawn a, chep tak karah Mbappe hian laklawh nei miah loin a pet lut thut - a hnai a, an hliah deuh pawh avangin Schmeichel tan dan a harsa.

France lawm chhung erawh a rei bik lo, defender Andreas Christensen chuan amah vengtu Adrien Rabiot-a ball pet tum a tauh khalh a, keeper Hugo Lloris tan dan hman a ni tawh bik lo; Pierre-Emile Hojbjerg-a khung tur dang theitu hi a hawihai hle.

Hun tawp nan minute li chauh a awm tawh, season hmang ṭha lem lo Griezmann-a cross chu Mbappe-a'n a su lut, squad nei chhah lo zawk Denmark tan sutna hun a awm tawh lo, tlang turin match hnuhnung berah chak ngei ngei an mamawh dawn.

Mi bik Mbappe
Denmark nen an inkhelh hmain Olivier Giroud-a chanchinin sawi a hlawh. Arsenal striker hlui hian Australia lakah goal hnih a khung a, an match hnihnaah khung leh ni se chuan Thierry Henry (51 goals) khumin ram tana khung hnem ber a ni ang.

Mahse, AC Milan striker hi Denmark defender ten an veng thiam viau a, a che hlei thei lo - record siam tur chuan match dang a nghah leh phawt a ngai dawn, table mawngphah Tunisia an hmachhawn dawn avangin hun ṭha a nei tura ngaih a ni.

Giroud an ven karah Mbappe a inlar thung a, ani hi kum 23 chauh la ni mah se a puitling tawh. World Cup hnuhnunga an champion ṭum pawhin player pawimawh bik a ni tawh, tun inelna neih laiah pawh goal thum a khung leh der tawh.

A kum a la tam loh avangin Mabppe hian hmabak a la ngah, tun ang zela a khel a nih chuan France tana goal khung hnem ber hi a ni thei dawn, chumi tur erawh chuan hliam nei loa khelh tam theih a pawimawh thung ang.

France tana chanchin lawmawm lo awmchhun chu Raphael Varane inhliam leh kha a ni, a dinhmun tur a la chiang lo. Presnel Kimpembe leh Hernandez an hliam tawh bawk, mahse Liverpool defender Ibrahim Konate an la nei a, bench-a ṭhu turin William Saliba an la nei bawk.