England-in USA lakah goal an khung lo

Iran laka Three Lions hahum ri chu a reh leh tawh - match hmasa bera goal ruk khungtu England hian Zirtawpni zan khan USA an hmachhawn a, goal an khung lo.

USA-in goal an khung bik loh avangin 0-0 in an inhnehtawk a, point khatah lungawi an zir. England-in hnehna an chan zawh loh avangin last 16 lut turin an nghah leh hret a ngai a, hetihlai hian USA erawh point hnih chauh an la hmuh avangin an dinhmun a him lo.

Zirtawpni tlai khan Iran chuan hun pek belha Rouzbeh Cheshmi leh Ramin Rezaeian goal hmangin Wales chu 2-0 in an hneh a, match hmasa berah goal ruk zet chhuah mah se Wales hneh turin an ṭha tawk tih an pholang.

Thawhlehni zana la inlan leh chauh tur group B team palite hian last 16 luhna chance an la nei vek a, he group hi a la ngaihnawm dawn chauh niin a lang.

A goal lo
Iran laka an game mawi tak avangin England-in fak an hlawh a, goal hmaah an hriam bawk avangin an hmuhnawm takzet. Mahse, USA nena an inkhelah erawh Three Lions hi a chhe zawk an ni a, chak zawk awm ta se USA chu point thum hmuh phu zawk an ni.

Tlarhmaah England player-ten USA an rum ṭhaih hleithei meuh lo. An chance neih langsarah Mason Mount-a shot chu USA goalkeeper Matt Turner chuan ṭha zetin a dansak a, captain Harry Kane-a'n a hun ṭha neih a tauh goal lo bawk.

Iran laka hmuhnawm taka khel Jude Bellingham-a'n a thiam a theihnghilh ta emaw tih mai tur khawpin a khel a, minute 69-naah Jordan Henderson chuan a thlak. England tana lawmna erawh Harry Maguire a khel ṭha a, tlarhnungah a rin tlak.

USA tan Christian Pulisic a hmuhnawm a, Chelsea-ah khelh tam a phu tih a pholang - bar a pet per kha a ui vawng vawng ang. Hetihlai hian Juventus midfielder Weston McKennie chuan holam takin a hlah bawk.

Mangṭha Wales?
Wales-in an match hmasa berah 1-1 in USA an inhnehtawkpui a, mahse, American team aia nem zawka ngaih Iran lakah an tlawm zui - Asian team hian 2-0 in Wales an hneh a, last 16 luh an beisei zel.

Team pahnih hi goal khung loin an inhnehtawk mai dawn niin a lang hman a, mahse, hun pek belhah Roozbeh Cheshmi leh Ramin Rezaeian ten goal khat ve ve an khung a, 2-0 in an chak daih.

Goal luh dan thlirin Wales hi vanduai angin a sawi theih a, inkhel en erawhin result awm tak a ni, tih an hria ang. Iran tana Ali Gholizadeh goal khung chu video assistant referee rawn a nih hnuah pawm a ni lo.

Belgian club Charleroi forward Gholizadeh hian post a pet per bawk a, Bayer Leverkusen forward Sardar Azmoun hmingṭhatna tur daltu pawh goal post tho a ni - a tawpah erawh Iran an chak ta tho a, an phu ang result an hlawh chhuak.