Neymar tel loa inlan tur Brazil
Champion tum zinga mi Brazil chu zanin dar 9:30 hian an inlan dawn a, Switzerland nen an inhmachhawn dawn - mahse, Brazil fan-ten chanchin lawmawm lo hriat tur an nei a, an thiampuipa Neymar chu hliam vangin zaninah a inlan thei dawn lo.
Brazil hian an match hmasa berah Serbia chu 2-0 in an hneh a, zaninah Switzerland an hneh chuan last 16 an lut thei dawn - Neymar inhliam mah se, Paris St-Germain striker tel lo pawhin tlarhmaah an ṭha tawk.
Group G inkhel dangah Cameroon leh Serbia chu vawiin tlai dar 3:30 hian an intawng dawn a, ram pahnih hi an match hmasa pahniha tlawm ve ve tawh an ni a, an tan tlawm a thiang tawh lo.
A bik takin Cameroon hian match hmasa berah Switzerland an ngam lo a, Serbia zawhah Brazil an la hmachhawn dawn avangin thih tha nen an beih a ngai tawh ang.
Neymar tel loin
Brazil leh Serbia inkhelh ṭumin Serbian player-te vawi kua ngawt Neymar lakah an foul a, tun World Cup-a player bitum hlawh ngun ber a ni - vawi li ngawt chu freekick a hmu hial.
Nikola Milenkovic-a'n a tackle leh meuh chuan Neymar-a'n a tlin lo a, minute 80-naah hliam vangin lakchhuah a ni. A tirah Neymar hliam hi a ngaihtuahawm lo nia sawi ni mah se, World Cup group stage-ah a inlan tawh dawn lo.
Neymar hian instagram lamah a ke hliam thlalak a pholang a, a la vung nasa hle - Brazil ṭantuten tun World Cup-a an thiampuipa hmuh zel an duh chuan last 16 an luh a ngai.
Brazilian right back Danilo chu ke rek hliam vang thoin a inlan thei dawn lo a, Juventus defender awm lo tur hi Brazil tan a pawi thui thei ang em, zaninah a hriat ang.
An ṭha tawk
Brazil coach Tite-a'n Neymar a awm chuan 4-2-3-1 formation hmangin, Neymar-a'n a duhna hmuna tal turin zalenna a nei ṭhin. Mahse, zaninah Neymar a awm dawn lo a, chuti a nih chuan Tite-a'n 4-3-3 a hman a rinawm.
Chuti a nih chuan midfield-ah Casemiro leh Lucas Paquetá kawp turin Fred emaw Fabinho emaw an lut ang a, tlarhmaah Serbia laka goal hnih khungtu Richarlison chu Raphinha leh Vinicius Junior ten an thlawp thei ang.
Brazil hian bench-ah Gabriel Jesus hoin Antony, Rodrygo, Gabriel Martinelli leh Pedro te ho an la dah thei a, ngaihtuahawm lo tak an ni!
Right back-ah Danilo aiah Real Madrid defender Éder Militão emaw Liverpool defensive midfielder-ten right back hna an chelh ang a, Thiago Silva leh Marquinhos ten a lailum luahin, Juventus left back Alex Sandro-a'n a hna ngai a chelh ang.
Switzerland an ṭha
Brazil ṭhatzia kan sawi a, chutihrual chuan match hmasa bera Cameroon ngamtu Swiss team hi sawi bo an thiang bik lo - match hmasa bera goal khungtu, Monaco striker Breel Embolo hi ven uluk a ngai dawn.
Embolo thlawp turin FC Augsburg forward Ruben Vargas leh tawnhriat nei ṭha Xherdan Shaqiri te an awm dawn a, bench-ah Galatasaray striker ṭha Haris Seferovic te bench-ah an la awm theih avangin an ṭha tawk.
Midfield-ah captain Granit Xhaka leh Nottingham Forest midfielder Remo Freuler an inkawp thei ang a, number 10 anga khel turin Eintracht Frankfurt midfielder Djibril Sow a awm bawk.
Switzerland-in kil tinah European top club-a khel phak player an kawl a, Brazil nena khaikhin rual ni rih lo mah se Selecao laka thil mak thlentir tur khawp squad an nei - zanin inkhel a hmuhnawm loh ring suh.