Dinga'n a khingpui a hneh

Mizo boxer lar Laldingliana chuan Inrinni zan khan Japanese boxer Yuya Nakamura chu unanimous decision-in a hneh a, professional boxing a luhchilh hnua vawi nga inhnek a hmachhawna vawi li a chakna a ni - vawi khat chu no contest-ah puan a ni.

Colombo, Sri Lanka-a inhnekah hian Dinga'n round tin a thunun a, WBC Asia bantamweight champion lai Nakamura hi round linaah phei chuan a hnek tlu hial - mahse, a tho leh a, a tawpah erawh Dinga a chak ta tho.

Tuipui boxer Dinga chuan, "Ka damsam loh avangin ka duh angin inhnek ka hmachhawn thei lo a, mipui hriatthiamna ka dil. A lehpek atan theihtawp ka chhuah ang," tiin Vanglaini a hrilh a, nizan khan a fight leh hun atan meeting an nei zui nghal.

Dinga chuan, "Pathian vang liau liaua hnehna chang ka ni a, chutihrual chuan ka manager Dr. Lalmuanpuia, ka coach-te Lalmuanpuia (Mampuia) leh Biakzuala Khenglawt (Gtea) te chungah pawh ka lawm takzet a ni," tiin Vanglaini a hrilh a, Mampuia hian Dinga hi a hmunah a ṭawiawm.