Cameroon tan tlawm a thiang lo

Football khawvela hming dai tawh ngai lo tur, Cameroonian Football Federation president ni bawk Samuel Eto'o-a'n World Cup ṭan hma khan Qatar-in quarterfinal an khelh tur thu a sawi a, Cameroon champion tur thu a sawi bawk.

Match hnih khelhah an tlawm ve ve avangin Qatar an tla fel der tawh a, Cameroon-in an match hmasa berah Switzerland (1-0) an ngam loh avangin tla thei dinhmunah an ding mek bawk - vawiin tlai dar 3:30-ah Serbia an hmachhawn dawn.

World Cup 2002-ah khan Cameroon hian 1-0 in Saudi Arabia an hneh a, khami hnu khan World Cup-ah chak an nei leh tawh lo a, kha inkhela chakna goal kha Eto'o khung a ni.

Tunah chuan Eto'o pawh kum 41 mi a ni tawh a, an ram football hotupa ber a ni tawh - a hnung zui tur a mamawh a, Bayern Munich forward Eric Maxim Choupo-Moting-a'n Serbia lakah a theihna a pholan a ṭul.

Choupo-Moting pui tur hian Brentford forward Bryan Mbeumo leh Lyon forward Karl Toko Ekambi te an awm bawk a, Serbian tlarhnung palian paltlang turin an ṭha tawk em, tih chu hunin a hril ang.

Serbia hian tlarhmaah European striker langsar ni phak Aleksandar Mitrovic leh Dusan Vlahovic nei mah se player pahnih hi 100% fit lo chunga a hruai an ni a, Brazil lakah an theihna tak tak hmuh tur a awm lo.

Mahse, he team hian Ajax attacking midfielder ṭha mi Dusan Tadic, Lazio midfielder ṭha Sergej Milinkovic-Savic leh Fiorentina striker Luka Jovic te an la nei a, Cameroon lakah chuan chhuanlam siam a rem dawn lo - fan-ten chak ngei an duh ang.