Punjab-ah Aizawl FC leh RoundGlass

Aizawl FC chuan zanin aṭangin I League away match an khel ṭan dawn. Mizo club hian zanin dar 7:00 hian Tau Devi Lal Football Stadium-ah Round GlassPunjab an hmachhawn ang. AFC hian Punjab club zawh hian December 2, Zirtawpni tlai dar 4:30-ah Churchill Brothers an hmachhawn lehnghal ang.

Aizawl FC head coach Standly Rozario chu damlohna avangin an chenna Karnataka-ah inentir turin a haw a, Mizo club hi Mizo coach pahnih Victor Lalbiakmawia leh Lalrozama Fanai ten kaihruai ang.

Standly tel loin MPL semifinal-ah Aizawl FC hian FC Venghnuai an hneh lo a, nomawi an humhim thei lo. Tun ṭum hi Standly tel loa I League match an khelh hmasa ber tur a ni a, Mizo coach-te tan fiahna ṭha tak a ni thei ang.

AFC khingpui tur RoundGlass Punjab hi team ṭha zinga mi an ni a, Mizo player ṭha pawh a kawl hnem. Punjab-ah hian Brandon VL Remdika, Samuel Lalmuanpuia, F. Lallawmawma, Daniel Lalhlimpuia leh Hmingthanmawia te an awm. Hei chauh hi a ni lo, season liam taa Gokulam champion puitu striker Luka Majcen a nei a, Mizo club tan a harsa dawn.