World Cup aṭanga tla hmasa ber a thlengtu

FIFA World Cup 2022 aṭanga tla hmasa ber chu a thlengtu Qatar an ni a, match hmasa bera Ecuador an hneh loh hnuah Senegal an hneh loh zui avangin an tla. Coach Felix Sanchez chuan 'hlawhchhamna' tiin an khelh dan chu a sawi.

Zirtawpni zan khan Al Thumama Stadium-ah Qatar leh Senegal te an inkhel a, African champion hi 3-1 in an chak. Senegal hian Boulaye Dia (41') leh Famara Diedhiou (48') te hmangin hma an hruai a, Qatar-in Mohammed Muntari (78') hmangin sut ṭhen mah se Bamba Dieng-a'n minute 84-naah chak nemnghehna goal a khung.

Senegal hian match hmasa berah Netherlands hneh lo mah se an khelh dan vangin fak an hlawh a, Sadio Mane awm lo an tuar tih erawh zep rual a ni lo. Qatar lakah erawh Senegal an insiamṭha a, point thum hlu tak a hlawh chhuak.

African champion hian 3-1 in hnehna chang mah se awlsam taka chak erawh an ni lo. First half-ah Akram Afif chu box chhungah Ismaila Sarr-a'n a ti tlu a, referee Antonio Lahoz-a'n penalty a pek loh avangin mualneitu ṭantute an lungawi lo hle.

Netherlands laka che ṭha lo Chelsea goalkeeper Edouard Mendy pawhin a theihna a lantir a, Almoez Ali leh Ismail Mohamad te goal khung tur ṭha takin a dang.

Qatar hi 3-1 a an chak loh avangin South Africa (2010) dawta World Cup thlengtu second round thleng zo lo an ni. South Africa erawhin point li an hmu a, Qatar erawhin point an la hmuh loh bakah team ṭha bera ngaih Netherlands an la hmachhawn dawn.

Qatar coach Felix Sanchez chuan, "Qatar hi ram te a ni a, a chhunga cheng hi an tam lo. Ram chhung league-ah inelna a sang tawk lo. Chutihrualin World Cup vawi khat khelhna a ni a, kan la khel leh thei a nih chuan tuna tawnhriat hmang hian ṭha zawkin kan khel thei ang," tiin a sawi.

World Cup 2026-ah chuan team 48 an tel tawh dawn a, Asia pawhin quota pariat an nei tawh dawn. Hemi a nih avang hian 2019 Asian Cup champion Qatar hi tuna World Cup tawnhriat nen an inpettlin theih a beiseiawm hle.