Argentina beiseina meichher kengtu Lionel Messi

“Lionel Messi a awm chuan, Argentina tan beiseina a la awm," tiin BBC chief football writer Phil McNulty chuan a ziak kalh mai a, he thu hi pawmpuitu an tam ang - Messi a awm miau chuan Argentine mipui leh khawvel ram danga anmahni ṭantuten beiseina an nei reng ang.

Argentina captain hian Mexico lakah goal ropui a khung a, substitute Enzo Fernandez khung tur siamsak bawkin an ram hi 2-0 in a chakpui, match hmasa bera an mualpho hnuah La Albiceleste an par chhuak leh ta.

World champion vawi hnih ni tawh hian November 30, Nilani zanlaiah Poland an hmachhawn leh dawn, an chak chuan group hmahruaitu ni chungin an tlang ang a, chak loh erawh chuan tla thei an ni thung, boruak a sang dawn.

Captain Messi
Chak loh chuan tla nghal thei dinhmunah an ding a, a nihna takah chuan player naupang zawkte tan chuan rilru a thlaphang duh viauin a rinawm. Hun harsa an tawk, hetih lai tak hi hruaitu ṭha an mamawh lai a ni.

Inkhelh hmain Messi chuan, "Kan beidawng thiang lo. Kan tan chuan final a ni, tihsual neih pawh a thiang lo. Chak ngei ngei kan ngai, tuna kan match hi World Cup thar a ni, kan hna tur chu kan chiang," tiin a sawi a, an tana match pawimawh bik a nihzia a sawi.

Argentina coach Lionel Scaloni-a'n Saudi Arabia laka an chetsualna siamṭhat nghal a tum a, defender Cristian Romero chu bench lamah dahin - Manchester United defender Lisandro Martinez chuan a vawi khat nan World Cup bikah bul a ṭan.

Lyon defender Nicolas Tagliafico pawhin bul a ṭan tawh lo, Sevilla defender Marcos Acuna chu a tir aṭangin a inlan nghal bawk a, match hmasa lama an tlarhnung pherh tak chu an tum ang ngeiin an siamṭha.

Goal pawimawh
Tlarhnung an ven uluk avangin goal nawr nat an harsat hret a, goal pawh kan hmu mai lo. Argentina hian last 16 luh beisei zel tur chuan goal khung ngei ngei an mamawh thung, minute 64-naah an mamawh chhanna Lionel Messi a rawn inlar.

Angel di Maria-a'n ball naran angreng tak a pek chu Messi hian shot nuam tawk tur chiahin a la thla a, a ke hman thiam vei lam ngei mai chuan yard 20-a hla aṭangin goal kilah a pet thut, keeper Guillermo Ochoa tan dan phak a ni lo.

Lusail Stadium-ah fans 88,966 an pungkhawm a, an thawm a ring takzet. Substitute Enzo Fernandez-a goal khung a mawi, a siamsaktu leh bul ṭantu chu Messi bawk a ni, a tir lamah Argentina khel ṭha tawk lo mah se a tawp lamah an hlauhawm hle.

Messi hi kum 35 mi a ni tawh, a tan kumin hi World Cup hnuhnung ber a ni tawh dawn. Hun pawimawh hmasaah a inlar thei a, chak ngei ngaihna match an khelh turah Poland tan mangchhia a thlen thei em, tih chu a takin kan hre thuai ang.

Scaloni thukhawchang
Argentina manager Lionel Scaloni chuan, "First half-ah kha chuan keimahni chauh pawh ni loin Mexico pawh khan an khel ṭha tawk bik lo, second half-ah erawh a bul ṭan fuh zawk kan ni a, kan mamawh hunah tak Messi a inlar bawk.

"Inkhel boruak danglam chhan chu player siksawi vang a ni lo, khelmual chhunga awmsa te pawh an ṭha vek, anni ho khawm tura Leo kan nei kha kan vannei," tiin a sawi a, an match lehpekah pawh chak an tum tur thu a sawi.

Argentina hi Poland nen inhnehtawk se, inkhel dangah Saudi Arabia an chak lo a nih chuan Messi leh Robert Robert Lewandowski te awmna ram hi last 16-ah an tlang ang, midang result ngaichang loa tlang tur leh hmahruaitu ni tur erawhin chak a pawimawh.

Scaloni chuan, "Messi chauh kan sawi thei lo, player dang ṭha pawh kan ngah. Mipui beisei angin kan la khel chhuak lo a ni mai thei, mahse ka naute hian theihna an neih miau avangin ka zam lo, match lehpekah pawh chak kan tum ang," a ti.