Costa Rica lakah Japan an chak lo

Germany an hneh avangin Japan beiseina a sang takzet a, mahse team nem zawka ngaih Costa Rica lakah Samurai Blue hi 1-0 in an chak lo. Goal awmchhun hi Keysher Fuller-a'n hun tawp dawn lama a khung a ni.

Nimin tlai Ahmed bin Ali Stadium-a inkhelah goal kan hmu mai lo, goal khung tum zawk Japan lamin goal hlauhawm siam erawh an harsat, mahni goal venhim ngai pawimawhtu Costa Rica lamin hna an thawk ṭha.

Costa Rica lamin hun ṭha ngah lo mah se, an neih chhun nia sawi theih an chhawr ṭangkai. Defender Fuller-a'n chiang deuhin keeper a 'rep' nalh hle, Japan goalkeeper Shuichi Gonda awmna a fuh tawk lo, ball kal hi kawh tak ni lo mah se a dang thei lo.

Hun tawp dawn hnaihah Japan lamin an nawr let na viau, mahse Costa Rica keeper Keylor Navas a che fuh hlauh a, bench aṭanga lut Liverpool forward Takumi Minamino-a'n penalty hlawh chhuah inbeisei mah se pek a ni lo bawk.

Luis Fernando Suarez-a enkawl Costa Rica hi goal sarih an chhuah avangin an zak a, tun World Cup khelh laiah match khata goal chhuah tam ber an ni hial. Hun rei lote chhungin an insiamṭha a, attacking game khel Asian ram laka goal an venhim theih tak avangin inrintawkna an neih belh dawn.

Japan hian an match hnuhnung berah Spain an hmachhawn dawn. Luis Enrique hote hian nizan khan Germany an hmachhawn a, inkhel result kan hre hman lo - eng result pawh thleng ni se Spain hmachhawn chu a awlsam lo ang.

Costa Rica hian an match hmasa zawkah Spain chu 7-0 in an hneh lo, an bul ṭanna a fuh loh avangin an goal difference a chhia, an match thumnaah Germany an hneh thei a nih erawh chuan last 16 an la lut ve thei dawn, a tawp thlengin group E a ngaihnawm dawn.