Netherlands chelhtu Valencia

Netherlands-in World Cup second round lut turin Ecuador lakah point thum hlawhchhuah an mamawh a, Cody Gakpo hmangin goal khung hmasa mah se Enner Valencia an chelh thei lo. Zirtawpni zan inkhelah hian Netherlands leh Ecuador hi 1-1 in an inhnehtawk a, group A aṭangin second round lut an la awm lo.

Khalifa International Stadium-ah Oranje an che ṭha a, minute rukna lekah Cody Gakpo-a'n ṭha zetin a pet goal. PSV Eindhoven forward hian Senegal an hneh ṭumin goal hmahruai a khung tawh a, Ecuador laka a khung leh avangin January transfer-ah a man a to sawt ang.

Louis van Gaal-a hoten goal dang khung belh an harsat a, an khel ṭha tawk lo bawk. Ecuador tana Pervis Estupinan goal khung chu Jackson Porozo offside vangin an pawm lo. Minute 48-naah erawh an thawhrim rah an seng a, Pervis Estupinan ball pet kawh zet chu Netherlands keeper Andries Noppert-a'n ti perin Valencia-a'n awlsam takin a khung.

Ram hming aṭanga thlir chuan Netherlands hian point hnih an hloh angin a sawi theih a, mahse inkhel en erawh chuan Ecuador an vanduai zawk tih an hre thei ang. Goal an khung hnu lawk hia Gonzalo Plata-a'n kawh zetin crossbar a pet per.

Ecuador hian point khat hlu tak an hlawh chhuah match tawp bera Senegal laka point an hlawhchhuah hrim hrim chuan knockout stage an lut dawn. Chutihrualin player pawimawh Valencia chu hliam vangin zawnchhuah a ngai a, a hmalam hun a chiang lo.

Netherlands erawh chhiarkawp danin la tling lo mah se match tawp berah Qatar an hmachhawn dawn a, 4-0 emaw a aia tama an chak lo a nih ngawt loh chuan an tla thei tawh lo.