England vs Wales: World Cup-ah British derby!
Group B match tawp ber chu zanin dar 12:30-ah hian khelh a ni dawn - England-in British derby khel turin Wales an hmachhawn dawn a, Iran leh USA an intawng bawk ang.
Team paliin last 16 luh beiseina an la neih vek avangin inkhel boruak a ṭang dawn a, a bik takin England leh Wales hi team inhal tak an nih avangin an inkhel en a châkawm tawh takzet.
England chu dinhmun duhawm berah an ding rih. Three Lions hian match hnih aṭangin point li an nei tawh a, Wales lakah si li faia an tlawm a nih ngawt loh chuan last 16 an lut ang - Wales tan hnehna chan ngei ngei a ṭul a, midang result-ah an innghat tel bawk.
Wales hian last 16 lut turin si li fai tala chak an mamawh a, an chak hrim hrim a nih chuan Iran leh USA an inhnehtawk a ngai thung - USA tan tlang turin chak a ṭul a, Wales-in England lakah hnehna an chang a nih loh chuan Iran tan draw result a tawk thung.
Phuba chu
Euro 2016-ah khan Iceland-in England chu round of 16 aṭangin mualpho takin an mangṭha a, Three Lions chak loh hi Wales player-te chuan nasa takin an lawm a, a video a darh leh si - tun thlengin England player-te rilru a dam thei lo.
Hliam vanga Euro 2016 a khel lo chungin Luke Shaw chuan, "Keni chuan khatiang khan kan ti ve lo ang," tiin Wales chet dan a dem a, a ṭawngkam aṭangin Three Lions hian Wales petchhuah an châk ang tih a chiang.
Tlawm pawh ni se an tlang dawn tho tih England-in an hria. Mahse, an tum tur hi Wales an ni miau a, chak an tum dawn - USA laka goal an khung loh avanga sawisel hlawh tak team hian fan-te lungawina thlen turin goal khung an mamawh bawk.
Chuti a nih chuan Harry Kane tan goal khung hna thawh a ṭul tihna a ni a, Mason Mount leh Bukayo Saka mawhphurhna a sang bawk. Hetihrual hian fan-ten Phil Foden hmuh an châk tawh a, Manchester City forward hian bul a rawn ṭan thut a nih pawhin a mak lo ang.
Inlan tur
Kyle Walker a dam tawh a, City right back hi Kieran Trippier aia lut tura beisei a ni a, fan-ten tun hnaiah Trent Alexander-Arnold inlan ngiat mah se Gareth Southgate-a ngainat zawng a ni tlat lo.
USA laka 'bo' Jude Bellingham tan insiamṭhat a ṭul a, Raheem Sterling pawhin club-ah season duhawm a hmang lo chunga Qatar-a hruai a nih chhan a pholan a ṭul - a tawi zawnga sawi chuan England-in last 16 lut tur mai ni lo, team boruak tiṭha turin chak an mamawh.
Wales-in Iran an hmachhawn dawn khan Wales sorkar chuan inkhelh chhunga class tihtawp an ram chhungah an phalsak a, mahse, an chak lo lai an en thung - zaninah si li fai tala chak an mamawh a, Gareth Bale-a mawhphurhna a sang dawn.
Iran laka a khelh chhiat avanga sawisel hlawh Bale hi a tihfuh ṭum tawn chuan ven rual a ni lo a, ani bakah Bournemouth striker Kieffer Moore, Fulham forward Daniel James leh Nice midfielder Aaron Ramsey te chet ṭhat a ṭul.
A hmuhnawm dawn
England vs Wales thawm a len rualin, group B inkhel hmuhnawm tur zawk thlang dawn ta ila, USA leh Iran thlan a awl viau ang - team pahnih an ṭha a, last 16 luh an beisei dawn.
USA hian tlawm la nei lo mah se draw ve ve a nih avangin point hnih chiah an la nei a, knockout round lut turin chak ngei ngei an mamawh - AC Milan full back Sergiño Dest, Juventus midfielder Weston McKennie leh Chelsea attacking midfielder Christian Pulisic te mawhphurhna a sang ang.
US boss Gregg Berhalter-a'n Borussia Dortmund rawlthar duhawm Giovanni Reyna chu minute 15 chauh a la khelhtir a, hei hian an squad chhah tawkzia a pholang. Hetihrual hian US hian England ngam lotu Iran an mitthla chuan an tisual ang.
England hmachhawn thei lo Bayer Leverkusen forward Sardar Azmoun-a'n Wales a hmachhawn thei tawh a, an hlauhawm sawt. Porto striker Mehdi Taremi a la awm bawk a, US tlarhnung ṭhiat turin Iran-in player an nei ṭha tawk.
British derby a nih avangin kan inkhel turin ngaihven a hlawh tin kan hria. Mahse, England kan ni a, mi zawng zawngin hneh an châk kan nih avangin hetiang boruak hi chu kan hrethiam sa a ni. Khelmual kan rah apiangin kan chungah beiseina sang tak a awm ṭhin a, chi ai lo leh huaisen taka khel chungin, kan ṭhat dan bera khelh chhuah kan tum ang. - Gareth Southgate, England coach