Ecuador nge Senegal tla dawn?

FIFA World Cup aṭanga tla hmasa ber chu inelna thlengtu Qatar an ni a, zanin hian group A aṭanga Qatar hnung zuitu tur leh second round lut tur a chiang dawn.

Zanin dar 8:30 hian Al Bayt Stadium-ah Netherlands-in Qatar an hmachhawn dawn a, Khalifa International Stadium-ah Ecuador leh Senegal te an inhmachhawn bawk ang.

Louis van Gaal-a kaihhruai Netherlands-in game hmuhnawm bik la pho chhuak lo mah se second round lut turin hna harsa a awm tawh lo. Thilmak a thleng a nih ngawt loh chuan Netherlands hian first round an paltlang ang.

Oranje tan match hmasa pahniha goal khung ve vetu Cody Gakpo-a'n en bik a hlawh dawn a, January transfer-ah dawrtu an ṭhahnem ang. Amaerawhchu Gakpo hian transfer lam ngaihtuah loin World Cup-a an insawrbing thu a sawi.

Netherlands khingpui Qatar tan knockout stage beisei theih loh mah se mualpho hliah khuh nan point hrim hrim hmuh a ṭul a, an hmu thei lo a nih ngat chuan inelna thlengtu zinga point hmu lo awmchhun an ni dawn.

Inkhel hmuhnawm tur zawka ngaih erawh Senegal leh Ecuador te inkhel a ni. Ecuador hian Qatar hneha bul an ṭan hnuah Netherlands nen 1-1 in an inhnehtawk. La Tri (Ecuador) hian bul ṭan chhe lo mah se Senegal lakah erawh rinkai lo zawk an ni dawn a, goal thum khungtu Enner Valencia inhliam avangin an hmabak a harsa lehzual.

Senegal-in Sadio Mane tel loin team ṭha an ni tih an pholang thei a, chutihrualin Netherlands an hneh loh avangin second round lut turin Ecuador hneh ngei a ṭul. Zanin hi Senegal tan thih leh dam inkar a ni tawh dawn a, coach Aliou Cissé-a'n sa huai a ser a ṭul dawn.

Africa ramte hi World Cup-ah beisei an pha ṭhin lo a, semifinal thleng an la awm lo. Cameroon (1990), Senegal (2002) leh Ghana (2010) ten quarterfinal an thleng tawh a, Algeria (2014 - last 16) leh Nigeria (1994 - second round) ten first round an paltlang tawh bawk.