Pathian malsawmna kan dawng - Chawnpui FC president

Chawnpui FC chuan an club history-a a vawi khat nan Mizoram Premier League final an lut a, Honda MPL9 final hi December 6, Thawhlehni zan hian RG Stadium-ah FC Venghnuai nen an khel ang. MPL9-ah Chawnpui hi league round-ah pathumna an ni a, semifinal-ah pahnihna Chhinga Veng FC an hneh.

Chawnpui FC president H. Lalrammawia chuan, "MPL9 kan khelh ṭantirh boruak kha han thlir kir ila. Club lian kan ni lo a, final chu sawi loh semifinal kan thlen tumahin an ring lo ang. Keipawhin final kan thlen phak hi ka ring lo," tiin rinkai an nih loh thu a sawi.

MPL9-ah Chawnpui hi a sang pali zingah an awm pha meuh lo a, season chawhnu lamah semifinal khel pha zingah an awm chauh. A sang pali zingah pawh hian dinhmun an sawhnghet thei lo a, round 13-ah panganaah an awm a, league match tawp berah Police hnehin semifinal an lut hram.

Rammawia chuan sawi chhunzawmin, "Pathian malsawmna kan dawng. Head coach hoa kan team thawhrimna, club leh Chawnpui G&SA hruaitute inpekna vang liau liau a ni. Chapo thei kan ni lo. Final-ah pawh pressure nei loin kan khel ang. Kan thlen chin apiangah Pathian hnena lawmthu hril zelin season kan khar ang," tiin Vanglaini a hrilh.

Chawnpui president Rammawia hi Dinthar FC-in MPL1 an champion khan club hruaitu zingah a tel a, MPL9-ah hian coach Lalsangzuala Hmar-in player ṭha a neih theih nan khelmual pawn lamah a thawkrim hle.