Germany beiseina siamtu Niclas Fullkrug

Nikum khan Euro 2020 khelh a ni a, Germany tana khel thei tur zingah Niclas Fullkrug a lang pha lo hrim hrim. Kum khat leh a chanve hnuah FIFA World Cup khelh a ni a, Germany beiseina siamtu chu kum 29 mi Niclas Fullkrug a ni.

Pathianni zan khan Al Bayt Stadium-ah Spain leh Germany an inhmachhawn a, La Roja-in Alvaro Morata hmangin an khung hmasa. Hansi Flick-a hote hi chak lo se, second round luh a har tawh dawn. Amaherawhchu substitute Fullkrug-a'n kawh zetin minute 83-naah siphurh sutna goal a khung.

Germany-in Costa Rica 7-0 zeta sawptu Spain lakah point hlu tak an hlawh chhuak a, Costa Rica hian Japan an hnehsak bawk avangin 2014 World Cup champion tan knockout stage luh theihna kawng zau tak a inhawng.

Spain an thiam
Luis Enrique-a'n Spain bul ṭantu zingah pakhat chauh a thlak danglam a, César Azpilicueta aiah Real Madrid defender Dani Carvajal a thlang. La Roja-in Costa Rica laka inkhel an thunun hlak angin Germany lakah inkhel thunun thei lo mah se an thiam tih hai rual a ni lo.

Germany lamin Kai Havertz leh Nico Schlotterbeck te awltirin Leon Goretzka leh Thilo Kehrer te an lut thung. Havertz hmun ruak chu Thomas Muller-a'n a hnawh khat a, Goretzka chu midfield tichaktu niin Spain ball inpe kual tichat turin Germany tlarhma an thawkrim hle.

Amaherawhchu Enrique nauten an hna an hrechiang a, tibuaitu karah goalkeeper Unai Simon-a'n inrintawkna nen ball a sem thei. Spain squad-ah Manchester United keeper David de Gea tan hmun a awm lo a, rinrawl atana Simon hman a nih chhan a chiang. Kum 25 mi Athletic Bilbao keeper Simon hian a ke a hmang thiam tlat.

Chutihrualin Spain hian Germany tlarhnung ṭhiah an harsat a, Ferran Torres ke a hmui tawk lo bawk. Second half-ah Torres aiah Alvaro Morata a rawn lut a, minute 60-naah Morata hian vei lam aṭanga Jordi Alba cross chu class zetin a pet goal. Spain an phur a, Germany an hlauthawng hle.

Musiala leh Fullkrug
Germany-in ball an chang tlem chungin Spain an khing tawk a, kum 19 mi Jamal Musiala chu player hmuhnawm a tling. Flick-a hote hi vannei chu nise goal khung hmasa thei an ni a, minute 39-naa Antonio Rudiger-a tauh goal chu VAR hmanga ennawn a nih hnuah offside vangin pawm a ni lo.

Morata hmanga Spain-in hma an hruai hnuah Musiala a hmuhnawm lehzual a, bench aṭanga lut Leroy Sane a ṭangkai bawk. Amaherawhchu Musiala hian mahni hma a sial hret a, vengtu nei lo Fullkrug pe mai loa amaha pet a thlan avangin siphurh an sut har phah.

Minute 83-naah Fullkrug a hun a thleng ta tho a, Musiala lakluh chu Fullkrug hian box chhungah laksakin chiang zetin a pet goal - Spain keeper Simon tan dan theih a ni lo. Germany hi an vanneih ṭum ni se goal dang khung thei tur an ni a, Sane-a'n keeper Simon chauh a hmachhawn hnuah a pet goal loh avangin 1-1 in inkhel a tawp.

Fullkrug hi goal khung thei striker a ni a, Germany rinrawl ni turin a ṭha tawk em, tih erawh zawhna a awm thei thung. Season liam ta khan Werder Bremen tan khelin 2. Bundesliga (second division) ah a inlan a, goal 19 khungin Bundesliga-ah a kaipui.

Tun season Bundesliga-ah Fullkrug hian match 14 aṭangin goal 10 a khung a, Timo Werner a inhliam bawk avangin Germany tan koh a ni. Inelna ṭan hma khan friendly match-ah Oman lakah Fullkrug hian second half aṭanga lutin goal awmchung a khung a, Spain lakah minute 70-naah lutin goal pawimawh a khung leh bawk. Germany chauh ni loin khawvelin Fullkrug an hre ta!