Wushu-ah Muanzami'n gold a la

Khelo India Women's Wushu League (NorthEast zone) chu November 22-25, 2022 chhung khan Imphal, Manipur-ah neih a ni a, Mizoram aṭangin wushu player pali kalin, ITI Veng tleirawl Lalmuanzami chuan 45 kg-ah gold a la.

Muanzami hian 2nd NorthEast Olympic 2022-ah khan silver medal a la tawh a, tun ṭumah hian hma sawn leh hretin gold a la. ITI Veng tleirawl hian game hmasa berah Manipur fighter a hneh a, quarterfinal-ah Assam aiawh hneh lehin semifinal-ah Arunachal Pradesh fighter a hneh a, final-ah Assam fighter ṭha a hneh.

NorthEast zone-a finalist chin hian India rampum Khelo India Wushu an hmachhawn thei dawn a, Mizoram aṭangin Muanzami chiahin a hmachhawn thei ang. Mizoram Wushu Association general secretary Lalrinliana'n Mizoram Wushu team hi a hruai a ni.