FIFA World Cup - Tlin theih dan leh tlak theih dan
FIFA World Cup-ah team tinin match hnih vek an khel tawh a, first round khel zo turin match khat chauh khelh a ngai tawh. Zanin aṭangin group match hnuhnung ber khelh ṭan a ni dawn.
He thu ziah lai hian group G leh H result kim kan hre hman lo a, tun ṭumah hian group A-F aṭanga team tlin theih dan leh tlak theih dan tarlan a ni ang. Vawi hnih ṭheuh inkhelh kual zawhah France chiah an la tling a, inelna thlengtu Qatar leh Canada an tla tawh thung.
Group A
Netherlands tan point khat a tawk. An chak lo a nih pawhin semifinal an la lut thei a, Ecuador-in Senegal an hneh a ngai thung.
Ecuador tan point khat a tawk. An chak lo a nih pawhin semifinal an lut thei a, Qatar-in Netherlands an hneh a ngai thung.
Senegal tan chak a ngai a, chutihrualin Senegal nen an inhnehtawk a nih pawhin Qatar-in Netherlands an hneh chuan an la tling thei tho.
Inelna thlengtu Qatar an tla tawh.
Group B
England-in Wales laka point an hmuh chuan an tling ang. An chak lo a nih pawhin goal difference a zirin an la tling thei bawk.
Wales tan second round lut turin England an hneh a ngai. Midang result-a innghat lo tur chuan goal lia an chak a ngai. Chutihrualin England an hneh hrim hrim a, Iran leh United States an inhnehtawk chuan an tling thei.
Iran-in US an hneh chuan second round an lut ang. An in draw erawh chuan semifinal lut turin England-in Wales laka point an hmuh a ngai thung ang.
US-in Iran an hneh chuan second round an lut a, an inhnehtawk emaw an chak lo emaw a nih chuan an tla.
Group C
Poland-in Argentina laka point an hmuh chuan second round an lut ang. An chak lo pawhin Saudi Arabia-in Mexico laka point thum an hlawhchhuah loh chuan an la tling thei a, goal difference a pawimawh thung ang.
Argentina tan midang result-a innghat loa tling tur chuan Poland an hneh a ngai a, an inhnektawk erawh chuan Saudi Arabia leh Mexico result thlir a ngai dawn. Saudi an chak chuan Argentina an tla a, an inhnehtawk emaw Mexico an chak emaw chuan goal difference en a ngai ang.
Saudi Arabia-in Mexico an hneh chuan an tling a, an inhnehtawk erawh chuan Poland-in Argentina an hnehsak a ngai thung.
Mexico tan chak ngei ngei a ngai a, Poland leh Argentina inkhel result-ah an innghat tel bawk. Poland-in Argentina an hneh a ngai a, an inhnehtawk erawh chuan goal difference en tur a nih avangin goal li tala an chak a ngai ang.
Group D
France an tling tawh. Group hmahruaitu ni chiang turin point khat a tawk a, an chak lo a nih pawhin Australia-in Denmark an sawp viau a nih loh chuan pakhatna dinhmun an la luah tho ang.
Australia tan tling chiang turin Denmark hneh a tawk a, Tunisia lakah France an tlawm a nih loh chuan draw chauh pawhin an tling thei bawk.
Denmark tan Australia hneh ngei ngei a ngai a, chutihrualin Tunisia-in France an hneh ve bawk a nih chuan goal difference a pawimawh ang.
Tunisa tan beiseina nei turin France an hneh ngei ngei a ngai a, Australia lakah Denmark an tlawm loh a ngai bawk.
Group E
Spain tan tling turin Japan laka point hmuh a tawk. An chak lo a nih pawhin an goal difference a ṭhat avangin tling turin an dinhmun a ṭha a, Germany-in goal sarih chhoa Costa Rica an sawp a nih ngawt loh chuan an tla thei lo.
Japan tan tling turin Spain hneh a ngai a, an inhnehtawk a nih erawh chuan Germany leh Costa Rica inkhel result an ngaihchan a ṭul dawn.
Costa Rica tan tling turin Germany hneh a tawk a, inhnehtawk chunga tling tur chuan Spain-in Japan an hnehsak a ngai.
Germany tan tling tur chuan chak ngei a ngai a, Spain ṭanpuina an mamawh tel bawk. Spain-in Japan an hneh chuan Germany tan chak a tawk a, Spain leh Japan an inhnehtawk a nih chuan Germany tan goal hnih tala Costa Rica hneh a ngai ang.
Group F
Croatia tan tling chiang turin Belgium laka point khat hmuh a tawk. Chak lo chunga tling tur chuan Canada-in Morocco an hneh a ngai.
Morocco tan tling turin beisei tur nei tawh lo Canada laka point khat hmuh a tawk a, hna harsa a nih tawh loh avangin Croatia emaw Belgium emaw an tlak a rinawm hle. Chak lo chung pawhin tling theihna dan tur kawng zau tak a la inhawng.
Belgium tan tling turin Croatia an hneh a ngai. Chutihrualin an inhnehtawk a nih erawh chuan Canada-in Morocco an hnehsak a ngai a, goal difference en tel a ngai bawk ang.
Canada tan beisei tur a awm tawh lo.
Tehfung chu
1. Point a pawimawh hmasa ber. Chak (3 pts), inhnehtawk (1 pt) leh chak lo (0 pts).
2. FIFA inelnaah hi chuan point hmuh a inang a nih chuan goal difference (GD) a pawimawh a, GD tih hian group match zawng zawnga goal difference en tur a ni.
3. GD a inang a nih chuan group match zawng zawnga goal khung tam (Goal For) en leh tur a ni.
4. Points bakah GD leh GF hmanga chinfel theih a nih loh chuan head to head en tur a ni. Head to head-ah hian points, GD leh GF inang team-te intumna (head to head) points en tur a ni a, team intlukte hi team hnih aṭanga team li thleng pawh an ni thei a ni.
5. Head to Head-a an point hmuh a inang a nih chuan head to head-a GD en leh tur a ni.
6. Head to Head-a pts leh GD a inang a nih chuan head to head-a GF en leh tur a ni.
7. Tehfung 1-na aṭanga 6-na thlenga a la inang vek a nih chuan group match-a Fair Play point hmanga en tur a ni ang. Yellow Card : -1 pt; Indirect red card (second yellow card) : -3 pts; Direct red card: −4 pts; Yellow card and direct red card: −5 pts. Match khatah player pakhat hi hremna chi khat chauha point paih theih a ni.
8. An la inang vek a nih chuan ṭhumvawr tur a ni ang.