Morocco lakah Belgium an chak lo ; An hmabak chu Croatia a ni dawn

World Cup 2022 champion tura rinkai zinga mi, mi tam takin hmachhawn an chak loh Belgium chu group stage pawh paltlang lo thei dinhmunah an ding mek - tlang tur chuan an hmabak a hautak dawn ta hle.

Pathianni tlai zan Group F inkhelah Belgium hian Morocco chu 2-0 in an ngam lo, inkhel dangah Croatia chuan si an phurh hmasak zet hnuah Canada chu 4-1 in an hneh a, point li hmuin table chung berah an awm.

Belgium leh Croatia te December 1, Ningani zanah an inkhel dawn, a chak zawk an tlang ang. Morocco chuan tla chiang tawh Canada an hmachhawn dawn, an chak a nih chuan midang result ngaihchan tel ngai loin an tlang bawk ang.

Group F aṭangin Canada an tla chiang tawh a, a chung lama awm pathum Croatia, Morocco leh Belgium te chu tling thei, mahse tla thei vek an la ni. An chak chuan an tlang dawn chiang vek, an chak lo emaw inhnehtawk emaw a nih chuan midang result an ngaihchan tel a ngai dawn.

Hlauh nei Belgium
Inkhelh banah Belgium coach Roberto Martinez chuan, "Ka naute zingah nuamti taka inkhel ka hmu lo, chak loh leh tihsual neih hlau em em chungin kan khel hram hram a ni berin ka hria," tiin a sawi, a thusawi hian an team boruak a tichiang viau.

Rualkhat ṭha bik (golden genaration) tia an sawi zingah - Kevin de Bruyne, Eden Hazard leh Thibaut Courtois ten bul an ṭan thei a, captain Hazard hi Chelsea tana Hazard ang kha a ni tawh lo a, tunah chuan Real Madrid tana khel phak lo Hazard a ni.

Manchester City midfielder De Bruyne hi player ṭha bik chu a ni, mahse mihring ve tho a ni a, duhthusama ṭhain a khel reng thei bik lo. Striker ṭha Romelu Lukaku chu hun tawp dawn lamah luhtir a ni a, danglamna a siam thei bik lo.

Martinez chuan, "Kan thiam loh leh theih loh vang a ni lo tih chiang takin ka hria, kan chak loh chhan chu kan rilru put hmang dik loh vang a ni. Canada nen kan inkhelh ṭum ai chuan hma kan sawn, mahse a tawp kan khar thei tlat lo kha a mak.

"Ka naute kha an thawkrim em em vek a, inrintawkna kan neih phawt chuan kan tho chhuak leh thei ang. Ka squad hi ka ringhlel ngai lo, kan match lehpeka hnehna kan chang a nih chuan kan tan World Cup a inṭan ve tihna a ni ang," tiin a sawi.

Morocco nen an inkhelh hmain De Bruyne chuan, "World Cup champion tur chuan kan upa deuh tawh," tia a sawi ni awm tak chu social medai lamah a darh, hei hi an defender pahnih a sawina niah an ngai zui bawk a, titi a ti tam hle.

Mahse, KDB-a chuan, "Khatiang thu kha ka sawi lai ka hre lo, midang pawhin ka sawi an hre lo ang, khawi aṭanga lo chhuak nge pawh ka hre lo. Belgium team ṭha tak ang kha chu kan ni lo tih erawh ka pawm," tiin a insawifiah.

Morocco an huaisen
Al Thumama Stadium-a inkhelah Morocco an huaisen a, a tir aṭangin goal khung tuma nawr ngam zawk an ni. Mual sir lamah an hmuhnawm zual, wing back Achraf Hakimi chu remchang nei hmasa a ni, mahse goal bar chungah a thlawh liam.

Chelsea forward Hakim Ziyech-a'n freekick a chhuih lut a, mahse VAR hmanga an ennawn hnuah Morocco player pahnih chuan ball luh hmain Belgium goalkeeper Thibaut Courtois an tibuai hman niah an ngai a, a tirah pawm deuh zuk mah se VAR hmangin an hnawlsak.

Minute 73-naah Morocco lamin sir deuh takah freekick an hmu leh a, a pet turin Abdelhamid Sabiri a rawn ding chhuak, ani hian Ziyech-a pet ang deuh chiahin a pet a, keeper ṭha Courtois chu a chetsual dan hmasa ang deuh chiahin a chesual nawn, a zawna ball kal a bawh ṭhelh.

Qatar World Cup khelh meka freekick lut hmasa ber a ni a, si phurh sut an tumna lamah Belgium tlarhnung a pawp zui. Hun tawp hma deuhin Zakaria Aboukhlal chuan Ziyech-a siamsak chu chiang zetin a khung, point thum hlu tak an hlawh chhuak.

Morocco hian an match hmasa zawka Croatia an tum ṭumin point khat an hmu tawh bawk a, match hnih aṭangin point li an nei. An hmabak hi tla chiang tawh Canada an nih avangin kawng a awlsam hret mai thei, chutih rualin chak chiang a sawi theih loh.

Morocco coach Walid Regragui chuan, "Inkhelah 100% rilru kan pe a nih loh chuan chak theih a ni lo tih kan hria, theihtawp chhuah bakah fans puihna kan dawng ṭha a nih erawh chuan eng pawh kan ti thei tih ka hria," a ti.

World Cup hnuhnung berah khan, group stage-ah African ram pangate an tla vek. Tunah erawh Morocco leh Senegal ten hnehna an chang tawh a, anni pahnih hian last 16 lut turin beiseina an la nei mek, an group match hnuhnung bera point an hmuh erawh a ngai ang.