A zawna Spurs hneh thei Lakers

Season bul ṭan chhe viau mah se tun hnaiah Los Angeles Lakers an che fuh ve tlat, an match hnuhnung pahnihah San Antonio Spurs an tum a, an chak ve ve. Hnehna an chan theih nan LeBron James a ṭangkai hle.

NBA regular season inkhelah Lakers hian Spurs hi 143-138 in an hneh, an thiampuipa James-a'n point 39 a nei a, tun season an hman laiah match khata point a neih hnem ber ṭum a tawng hial.

Lakers hian a chawn vei lam hliam vangin Anthony Davis an chhawr thei lo, hrem vangin Patrick Beverley a inlan thei lo bawk. Mahse, James bakah Dennis Schroder an nei a, tun hnai an match hnuhnung paruka a vawi nga nan an chak thei.

Lakers an che ṭha tia sawi theih a ni, chutihrualin Spurs hi tun hnaiah a zawna vawi riat tlawm an ni. November 14 hnu lamah vawi 13 ngawt chak loh an nei tawh, an chet chhiat tluan lai a nih avangin Lakers tan inchhuan viau chi a ni lo ang.