Canada pet chhuaktu Croatia

Alphonso Davies-a'n an ram Canada tan mellung pawimawh bik a phun a, an phurna, beiseina leh hlimna erawh Croatia pasalṭhaten an hmeh mihsak thung - an sulhnu erawh a dai tawh ngai lo ang.

Pathianni zan Khalifa International Stadium-ah Canada an lawm hmasa, inkhel ṭan aṭanga second 68-na lekah Tajon Buchanan-a cross chu Davis-a'n a tauh lut ngal zawt, an ramin World Cup-a goal an khungna hmasa ber a ni.

Bayern Munich defender hian Belgium lakah penalty a hlah a, tunah erawh player nazawngin an khung theih loh tur a khung leh ta lawi si. World Cup aṭangin tla mah se, an tan chuan goal hlu tak a nihna a bo chuang lo.

Canada coach John Herdman chuan, "Kan tan chuan bul ṭanna ṭha leh hun hlimawm bik a ni chiang hle, tun hma lama boruak kan la tawn ngai reng reng loh thil kan tawng a, lawm dan chintawk pawh hriat a harsa," tiin an goal khung chuangchang a sawi.

North America khawmualpui ram hi hlim hle mah se Croatia tan hlahthlem ngawt a rem bik lo. World Cup 2018 finalist hian Andrej Kramaric-a goal hnih bakah, Marko Livaja leh Lovro Majaer te goal khat ve ve hmangin an chhanglet.

Luka Modric hoa khel Croatia tan tlang tur chuan, match hnuhnungah Belgium laka point hmuh hrim hrim a tawk dawn, an chak loh erawh chuan tun dinhmuna group F hmahruaitu la ni mah se an la tla thei thung.