Australia hnehin Canda an champion

Ram leh ram mipa tennis team hmanga inelna Davis Cup khelh zawh a ni, final-ah Canada chuan Australia chu 2-0 a hnehin an champion a, tournament-ah hian an champion vawi khatna niin mellung pawimawh an phun.

Singles match hmasa zawkah Denis Shapovalov chuan Thanasi Kokkinakis chu 6-2, 6-4 in a hneh nghal, semifinal lama chet fuh tawk lohna a insiamṭha a, an ram Canada tan inelna bul a ṭan fuh nghal hle.

Shapovalov ang bawkin Felix Auger-Aliassime pawh Canada tan a che fuh, world number 6 hian Alex de Minaur chu 6-3, 6-4 in a hneh ve bawk a, best of three khelh turah a hmasa pahniha an chak avangin an tlang nghal.

Auger-Aliassime chuan, "Duhthusam a thleng dik e, kei chauh ni loin team member zawng zawng bakah kan ram mipuite hian tun hun ang hi an nghak rei tawh, tunah chuan kan hlimna ni a lo thleng ve ta," tiin a sawi.

Davis Cup khelh hi a awlsam lo, a bik takin finals khelh tur chuan paltlang tur a tam. Canada pawh hian tournament hi an khelh vawi thumna chauh a ni a, an tan chuan champion hi thil hlu bik a ni ngei ang.