MPL9 - Goal Khungtute

Honda Mizoram Premier League Season 9-ah match 60 khelh a ni tawh a, goal 153 a lut tawhin final chauh khelh tur a awm tawh. Tun dinhmuna goal khung tam MC Malsawmzuala a ni a, Chawnpui FC forward hian goal riat khung tawhin top scorer ni turin a dinhmun a ṭha tawh hle.

MPL-ah hian league round match 56 khelh a ni a, heta ṭang hian goal 139 a lut. League round bikah hian match tina 2.48 lut ang a ni a, knockout stage match hnih aṭangin goal 13 ngawt lutin match tina goal 3.25 lut ang a ni. Tun season inelna hrim hrimah match tina goal 2.55 lut ang a ni.

Top Scorer ngai!
MPL thlirlet chuan top scorer ṭum hnih ni thei hi Mizoram Police player Lalbiakhlua (Biaktea) leh Lalfakzuala te chauh an la awm a; MS Dawngliana (MPL1), F. Lalrinpuia (MPL4) Laldampuia Tochhawng (MPL5) leh MC Malsawmzuala (MPL8) te ṭum khat ṭheuh top scorer an ni tawh bawk.

MPL8-ah khan Siaha tlangval MC-a hi Chhinga Veng tan top scorer a ni a, tun ṭumah Chawnpui tan khelin top scorer chawimawina hi dawng chiang tura ngaih a ni tawh.

MC-a hian goal riat a khung tawh a, amah hnaihtu Malsawmfela (7 goals), Dawngtea (6), David Lalhlansanga (5), Jonathan Lalrawngbawla (5) leh Lalchhawnkima (5) ten khelh tur an nei tawh lo. Siaha tlangval elpha teuh ber chu goal li khung tawhtu Malsawmzuala Tlangte a ni a, Venghnuai FC forward hian final-ah goal li a khung a rinawm loh.

Pa vanduai Sawmfela
Mizo striker ṭha ber zinga mi Malsawmfela hian season ṭha tak a hmang a, tun hmain MPL best player leh best forward chawimawina dawng tawh mah se top scorer la ni ngai lo.

Tun season hi Sawmfela hun angin ngaih theih ni mah se MC-a a che ṭha ta zawk a, Police striker hi a vanduai tel ve bawk. Mizoram Police-in Sikkim-ah invitation tournament an khel a, kim loa Chawnpui FC an hmachhawn avangin semifinal an thleng pha ta lo.

Sawmfela hian league match hnuhnung ber khel se Police hi semifinal a lut thei dinhmunah an ding. Hei chauh hi a ni lo, semifinal an lut a nih chuan MC-a khelhna Chawnpui zawk hi an tla dawn tihna a ni a, Sawmfela'n match khelh tur a neih belh bawk.

Amaherawhchu Police-in MPL aia invitation tournament an ngaih pawimawh Sawmfela'n a tuar a, top scorer a ni dawn lo. Police pawhin MPL nomawi chawi theihna hun ṭha an bawhpelh a, tualchhung football-a (tun hma chhiar tel vekin) sulhnu nei ṭha bera sawi theih Police hian MPL nomawi an la chawi lo!