Cameroon leh Serbia inkhelah goal ruk a lut!

Nimin tlai khan World Cup inkhel hmuhnawm chhawpsak kan ni a, Cameroon leh Serbia inkhelah goal ruk ngawt a lut - team pahnih hi 3-3 in an inhnehtawk a, last 16 luh beiseina an la nei ve zel.

Cameroon tan Jean-Charles Castelletto chuan goal hmahruai khung mah se Serbia tan Strahinja Pavlovic, Sergej Milinkovic-Savic leh Aleksandar Mitrovic ten an chhanglet a, awlsam takin an chak dawn niin a lang hman.

Mahse, Cameroon-in mualpho taka World Cup mangṭha an duh bik lo - Vincent Aboubakar leh Eric Maxim Choupo-Moting hmangin an si phurh an sut zo a, hun tawp thlenga goal dang lut loin 3-3 in an inhnehtawk.

Group G inkhel dangah nizan khan Brazil leh Switzerland an inkhel a, result kan hre hman lo - team pahnih result a zirin Cameroon leh Serbia tana last 16 lut tura mamawh a dang thei ang.

Bul ṭan ṭha
Player nei ṭha zawk Serbia-in bul an ṭan ṭha a, Fulham striker Aleksandar Mitrovic chuan chance duhawm vawi hnih ngawt nei mah se a chhawr thei lo thung - minute 29-naah Cameroon-in an hrem zui.

Jean-Charles Castelletto chuan corner aṭanga ball kal zel chu hnai set sawt aṭangin goal-ah a chantir a, Ligue 1 club Nantes centre back tan ram tana a goal hmasa ber a ni.

Mahse, Cameroon hian Serbia an chhaih kawlh ve mai niin a lang. First half hun pek belhah Serbia tan Strahinja Pavlovic leh Sergej Milinkovic-Savic ten goal an rawn khung a, chawlhlawk an hman meuh chuan 2-1 a ni.

Second half an ṭan a, Serbia-in an duhtawk lo - Pavlovic goal khung tur siamsaktu Andrija Zivkovic chuan Mitrovic tan a siamsak ve leh a, kum 28 mi striker hian ram tan innghahna tlak a ni, tih pholangin goal-ah a chantir.

Sakeibaknei hahum
Cameroon-in goal hmahruai an khung hnuah goal thum an chhuah a, an puanthuah an tel mai dawn niin a lang tawh. Mahse, coach Rigobert Song-a'n ngaihdan dang a nei a, midfielder Martin Hongla la chhuakin striker Vincent Aboubakar a luhtir.

Kum 30 mi striker a luh hnuah Indomitable Lions an hlauhawm sawt a, khelmualah minute riat chiah a awm hman tihin Aboubakar hian mawi zetin Serbia keeper Vanja Milinkovic-Savic a pir khum a, goal-ah a lut zui - assistant referee-in offside phar mah se video assistant referee a inrawlh a, pawmsak an ni.

Cameroon-in an duhtawk lo - minute thum a liam a, Aboubakar bawk kan hmu nawn. Saudi club Al Nassr striker hian ṭha zeta ball a tlan luhpui hnuah hmasial lo takin Choupo-Moting tan a siamsak.

Bayern Munich striker Choupo-Moting hian harsatna nei loin goal-ah a lo chantir a, 3-3 a ni. Serbia tan Mitrovic chuan chance ṭha nei leh mah se a chhawr lo a, a tawpah team pahnihin point an insem.