Portugal-in Uruguay an ngam; a thiam 16 zingah an tel
Cristiano Ronaldo hoin Portugal chuan World Cup last 16 an lut ta der a, Thawhṭanni zan khan a thiam 16 zinga an hming ziak kai turin Uruguay chu 2-0 in an hneh.
Portugal tan Bruno Fernandes chuan goal hnih a khung a, a goal hnuhnung zawk hi penalty aṭanga lut a ni - a goal hmasa zawk pawh Ronaldo-a'n ama khung emaw a ti hman a, mahse, Manchester United tana a khelhpui Bruno khung a ni.
Ronaldo chhuah hnuah Portugal-in penalty an hmu zui a, Bruno bawkin goal-ah a chantir a, tlarhmaa Luis Suarez, Edinson Cavani leh Darwin Nunez neitu Uruguay lamin a chhanletna tur an nei lo.
Portugal-in last 16 an luh tawh laiin Uruguay tan erawh hmabak a hautak a, last 16 lut tur chuan South Korea ngamtu Ghana lakah hnehna an chan a ṭul - Ningani zanah an intawng ang.
Uruguay an dawih
South Korea laka goal khung lo Uruguay-in an beiseina chhi nung turin chak an mamawh a, mahse, coach Diego Alonso-a'n Portugal nawr aiin tlarhnung venhim a ngai pawimawh a, an huaisen tawk lo.
Alonso hian tlarhmaah Liverpool striker Nunez leh Cavani a inkawptir thei a, bench-ah South Korea laka khel ṭha lo Luis Suarez a dah thei bawk - anni chawm tur hian Real Madrid midfielder Federico Valverde leh Tottenham Hotspur midfielder Rodrigo Bentancur an nei bawk.
En mai chuan Uruguay tlarhma an ṭha tawk a, mahse, Portugal lakah an hlauhawm tawk lo - Bentancur-a'n a chance duhawm a chhawr lo a, bench aṭanga luhtir Maxi Gomez chuan si phurh sutna remchang a neihah post a tih per bawk - a vanneih zan a ni lo.
Cavani leh Suarez an upa ve ta deuh niin a lang a, Nunez-a boruak lian mah se ball ṭha pek a nih meuh loh avangin Liverpool forward tan danglamna thlen a harsa tih a lang.
Ronaldo a reh
Portugal tan Ronaldo langsar bik lo mah se Portugal-in an legend khelh ṭhat loh ni pawha mawhphurhna la theitu an nei a, a hming chu Bruno Fernandes a ni - Manchester United midfielder hian minute 54-naah Ronaldo tan ball a thlawh lut a, a goal.
Ronaldo hian a tauh goal niin a lang a, United nena inṭhen hlim forward hian goal hi a khung angin a lawm. A tirah pawh Ronaldo hming tarlan a ni a, mahse, replay enin, ball hian Ronaldo lu a fuh chiah lo niin a lang.
Stadium chhung au rinna aṭangin goal chu Bruno Fernandes khung a nih thu an rawn puang zui. Uruguay-in goal an chhuah hnuah nawr an mamawh tih hriain Portugal an nawr let a, mahse, a pawimawh ber goal an khung thei lo.
Hun pek belh minute thumnaah Jose Gimenez handball vangin Portugal-in penalty a hmu zui - Ronaldo a chhuah tawh avangin Bruno a lo pen chhuak a, Portugal chak nemnghehna goal a khung.
Sawi neuh neuh
Ronaldo-a'n ball a tawk fuh lo niin lang mah se, Bruno Fernandes goal khung kha tauh lo tum lo ta se, keeper tana man nuam tawk vel tur niin a lang a, goal khungna kawngah tha a thawh tho.
Hetihrual hian FIFA panel chuan goal chungchanga thutlukna siam tur a awmin an zir chiang leh ṭhin a, kha goal kha a hnuah Ronaldo khung angin an record leh thei tho - Ronaldo khung angin pawm ta se, World Cup-a Portugal tana goal khung hnem ber Eusebio (9 goals) a nih rual ang.
Portugal penalty hmuh dan chu sawisel a ni bawk - Jose Gimenez chuan Fernandes ball khalh lai chuhsak a tumna lamah a tlu a, a tlu tur chu a kutin inbengkang a tum a, a kutin ball a tawk fuh.
Football danah chuan hei hi penalty tur a ni lo. Mahse, video assistant referee a inrawlh hnuah referee Alireza Faghani chuan a ennawn a, Uruguay beiseina tibo turin penalty hi a pe a ni.