South Korea dinhmun a derthawng Ghana an ngam lo
Thawhṭanni zan World Cup inkhel hmuhnawm ber thlang dawn ta ila, inkhel entu tam zawkin South Korea leh Ghana inkhel kha an thlang ngei ang - goal nga ngawt a lut a, a tawpa vanduai zawk erawh South Korea an ni.
Ghana tan Mohammed Kudus chuan goal hnih khungin, Mohammed Salisu chuan goal khat a khung bawk a, South Korea tana Cho Gue-sung-a goal hnih khungin awmzia a nei phak lo.
A tawpah South Korea an ṭap a, Ghana an lam thung - mahse, a la tawp lo. Team pahnih hi last 16 lut thei ve ve an la ni a, tla thei ve ve an ni bawk. Thil thleng thei tam tak a la awm. South Korea tan last 16 lut turin match tawpa bera Portugal an hneh a ṭul a, Uruguay-in Ghana an hnehsak a ngai bawk.
Uruguay leh Ghana te hi an inhnehtawk a nih pawhin goal hnih tala an chak chuan South Korea hi an tling tho ang.
Ghana tan tling chiang turin Uruguay an hneh ngei a ngai a, an inhnehtawk a nih pawhin Portugal-in South Korea laka point an hmuh chuan an la tling tho.
Ghana an ṭha
Match hmasa berah Portugal an ngam lo a, Ghana-in South Korea laka an tlawm chuan an tla dawn tih an hria a, tlarhnung an rem phui ṭha a, an tih tur an chiang bawk.
South Korea-in a tir aṭangin Ghana an nawr nghal a, goal khung ngei an duh. A bik takin Tottenham Hotspur forward Son Heung-min an zawng nasa a, mahse, Ghana lamin an tih tur an hre tlat!
Asian player awm tawh zinga ṭha ber ang hiala tam takin an ngaih hi ball a chan tawh chuan Ghana player pahnihin an vil chawt zel a, European striker 'hot' ber pawl hi a duh angin a tal thei lo.
South Korea an talbuai a, Ghana-in goal an khung thung - minute 24-naah freekick aṭanga ball kal chu South Korea player-ten an clear thei lo a, tlarhnung buai nuai karah Southampton defender Salisu chuan hmahruaina goal ni turin a khung.
Beiseina thamral
South Korea an insiamṭha hman lo. Minute 34-naah Jordan Ayew-a ball cross luh chu Ajax midfielder Kudus chuan a tauh lut leh a, South Korea tlarhnungin an tih tur an ti tawk lo.
Mahse, Taegeuk Warriors-ten tlawm an tum bik lo - minute 58-naah Cho Gue-sung a inlar a, kum 24 mi forward hian Real Mallorca attacking midfielder Lee Kang-In siamsak chu a tauh lut.
Cho a reh mai lo - minute 61-naah Ghana defender palian karah zuang sang berin a tauh lut leh a, 2-2 a ni der. Cho Gue-sung hian season hmasa lawk kha chuan South Korea second division a la khel!
Mahse, South Korea hlim chhung a rei lo. Si phurh an sut zawh aṭanga minute sarihna lekah Kudus bawk kan hmu a, mual vei lam aṭanga ball kal chu Inaki Williams chuan lo pet ṭhelh mah se Kudus ke bulah a tla a, chakna goal ni turin a khung.
Boruak a sosang
South Korea-in si phurh sut zawh ngei tumin, theihtawpin an nawr a, mahse, Ghana tlarhnung an ṭang khawng tlat - hun pek belh minute 10-na a liam dawn tawh tihin corner an hlawh chhuak a, mahse, an pet hmain referee-in hun tawp ham rik a ham.
English referee Anthony Taylor thutluknaah South Korea manager Paulo Bento a lungawi lo a, kum 53 mi Portuguese coach hian a lungawi lohna a lantir nasat avangin red card pek a ni.
South Korea assistant coach Sergio Costa chuan, "Corner petna hun ṭha kan nei a, mahse, kan hun neih chu referee-in min chhuhsak a ni," tiin referee chunga an lawm loh thu a sawi.
Costa chuan a pu chhan zuiin, "Paulo khan referee hnenah ṭawngkam mawi lo a hman awm reng ka hre lo. Thutlukna dik lo taka siam vanga lungawi loin a lungawi lohna a lantir ve mai a ni," a ti a, referee a dem.