France tan hahchawlhna hun?

France manager Didier Deschamps tan a naute hahchawlhtir theihna remchang a ni dawn. Zanin dar 8:30 hian Tunisa an hmachhawn dawn a, group D hmahruaitu ni turin goal chhuah tam loh a tawk, point an hmuh hrim hrim chuan a chung berah an awm chiang.

Last 16 an luh chian tawh avangin Les Bleus tan player dahṭhat a pawi lo, club leh ram tan match an khelh hnem hlawm avangin player inhliam an tam phah tia sawi theih a ni a, chuvangin Deschamps-a'n squad a siksawi viau a rinawm.

France an tling tawh. Group hmahruaitu ni chiang turin point khat a tawk a, an chak lo a nih pawhin Australia-in Denmark an sawp viau a nih loh chuan pakhatna dinhmun an la luah tho ang.

Khawthlang media ten an tarlan dan chuan, goalkeeper leh captain ni bawk Hugo Lloris pawh hahchawlh tir tur zingah a tel, Alphonse Areola a hliam avangin Steve Mandanda tan World Cup khelh theihna remchang a ni thei dawn.

Qatar rama zin ve, mahse rinrawl ni phak chiah lo Matteo Guendouzi, Youssouf Fofana, Marcus Thuram leh Kingsley Coman te tan hun ṭha a ni thei tura ngaih a ni a, Arsenal defender William Saliba pawhin minute a neih a rinawm.

Striker Olivier Giroud-a'n France tana goal khung hnem ber record siam turin goal khat a la mamawh a, mimal record chu pawimawh viau mah se last 16 khel tur an la nih avangin striker ṭha hi khek a fuh zawk ang.

Group D match dangah Australia leh Denmark an inhmachhawn dawn, ram pahnih hi France hnung zuia tlang thei ve ve an la ni. Christian Eriksen awmna Denmark hian ṭha taka khel chungin Les Bleus an ngam lo, tlang tur chuan an chak ngei ngei a ngai.